Ka Mihmyntdu Community Social Welfare Association (MCSWA) lyngba ka Drop-In & Day Care Centre for Senior Citizens, kala pynlong ïaka prokram ai jinghikai bad rakhe kyrpang ïaka sngi jong ki riew tymmen kaba la long hynnin ka sngi Thohdieng ha Panaliar, Jowai.
Ïa kane ka prokram la pynlong halor ka phang “The Age of Longevity: Rethinking Systems for Longer Lives” ha ryngkat ka jingkyrshan lang jong ka District Social Welfare Officer (DSWO), West Jaiñtia Hills. La pynlong ïaka ka prokram da ka jingthmu ban pynsngewthuh shaphang ka hok longbriew jong ki riew tymmen bad ban ïasam lem ïa ki jingmut ba ki don.
Ïa ka jingïalang la pynïaid da u Sooman Passah, la ïoh ka jingkren pdiang na u S. Passah uba dei u Dkhot jong ka Drop-In & Day Care Centre bad la ïoh ka jingkren ba kongsan na ka Dr. J. N. Shullai, Director ka MCSWA.
La ïoh ka jingkren halor kane ka phang jong ka jingrakhe da ka Bniahdiam Bthuh, Dkhot ka Drop-In & Day Care Centre bad kumjuh na ka kong Kyntiewlin Pakyntein, Advocate, Ph.D. Research Scholar bad ka Lawyer kaba la kren halor ki hok bad ki lad jingïada katkum ka aiñ ïa ki riew tymmen.
Ha kane ka prokram la ïoh ruh ïa ki jingkren lyngkot na ka kong P. Paswet, ka kong L. Kynjing bad ka kong G. Pde, ki Dkhot jong ka Drop-In & Day Care Centre. Kiba la kren halor ka jingdon bynta lang ki riew tymmen bad ka imlang ka sahlang.
La pynkut ïa ka prokram da ki kyntien ai khublei na ka kong G. Laloo, dkhot ka Drop-In & Day Care Centre.
