U Symbud Myntri Rangbah ka Jylla u Ma Sniawbhalang Dhar ha ka 22 tarik Nailar 2026 u la ai khublei ia u Myntri Rangbah ka Jylla u Conrad K Sangma bad kumjuh ia u Myntri Rangbah ka Jylla Assam u Himanta Biswa Sharma halor ka jingshim Khia jong ki arngut ki Myntri Rangbah kata u Myntri Rangbah ka Jylla Meghalaya bad Assam halor ka jingjia kaba la Jia dang ha kine ki khyndiat sngi ha ka 19 tarik Nailar 2026 ha Shillong.
Na ka Liang u Ma Sniawbhalang Dhar haba kren sha ki lad pathai khubor hadien ba la wai ka jingialang bad u Myntri Sorkar ka Assam Atul Bora ha ka jingiadon ryngkat ki ophisar ka Jylla Assam bad ka Jylla Meghalaya ha Koinadhara State Guest House na ka bynta ban ia kren haba ia dei bad ka jingjia ha ka 19 tarik Nailar.
U Symbud Myntri Rangbah ka Jylla u Ma Sniawbhalang Dhar u la pynpaw hadien Lai kynta ka jingialang ka jingiakren ka long kaba seisoh.
Nalor kata u la ong ka Sorkar Jylla ka pynpaw ia ka jingsngewdiaw hadien ba mih ka huri hura bad ka Sorkar ka kular ruh ban shimkhia mardor halor Ka jingjia kaba la Jia ha ka 19 tarik Nailar 2026.
Shuh shuh u la ong ruh ba ka Sorkar ka la Kem ia ki Nongialam KSU ba kynthup naduh u President, General Secretary bad Vice President ba pynkhein ia ka Meghalaya Maintenance of Public Order Act.
Shuh shuh u la pyntip ba ka Sorkar ka la register haduh 15 tylli ki FIR halor ka jingjia ha ka 19 tarik Nailar 2026.
Nalor kata u la pynpaw haduh 5 ngut ki don kiba kah durkhmat kiba la ithuh kiba pynmih jingklumar ha ka 19 tarik Nailar ban pynjulor ia ki Kali Assam.
Ka tnad Pulit ka dang tohkit bad kan leh ia kaba donkam bad la thaw ia ka kynhun SIT ban lap ia kiba donkti bad ban leh katkum ki kyndon aïñ.
Nalor kata u la pyntip kumba 3770 tylli ki Kali Assam la pynpoi suk na Jylla Meghalaya sha Assam bad u la pyntip ruh ba sa kumba 400-500 tylli ki Kali Assam ki lah don ha lynti ban leit phai sha Assam , bad ia kiba dang sah ka Sorkar Meghalaya kan sa shimkhia ban pynpoi suk hapoh 48 kynta ha ryngkat ka jingpahara ban pynpoi suk ia ki.
U Ma Sniawbhalang Dhar u la kyrpad ruh ia ki nongshong shnong ka Jylla ba kin long kiba jai jai bad kyntu ruh ia ki Sengbhalang ba kin long kiba jai jai bad lada don kino kino ki mat ki dei ban wan ia kren bad ka Sorkar ka jingkhang ka plie nangne shakhmat.
