Mynta ka sngi u Myntri Rangbah ka Jylla u Conrad K Sangma ula pyntip ba ka Kynhun Myntri (Cabinet Meeting) kaba la shong mynta ka sngi kala iatai haduh 6 (Hynriew tylli) ki mat kiba kongsan.
Ka mat kaba nyngkong eh kaba ka Kynhun Myntri kala iatai ka long halor ka jinglyngshop ki bor mariang. Khnang ban shai ka rukom ai jingiarap lyngba ki tnad sorkar haba jia ki jinglynshop mariang, la shim ba ia ka Jingbeh ba jur ne ka jinglynshop jong ka lyer kaba khlaiñ wat la kam dei ka Eriong ruh, hynrei kaba la wanrah pat ia ki jingjulor yn shim ia ka kum ka jinglynshop mariang ne ka State/local disaster. Kum kine ki jinglynshop mariang ki shait jia ha kine ki por kiba leit noh, hynrei kim iahap bad ka jinglynshop jong ka eriong ne erlang thari, kumta ka shem shitom ia ki bor pyniaid District kum ki Deputy Commissioner ban pynhap ha kano ka kyndon ban pynioh jingiarap ia ki lanot.
Kumta u Myntri Rangbah ula pynshai ba nangne shakhmat ia kano kano ka jingbeh lyer ba jur kaba wanrah ia ka jingjulor yn kheiñ ne pynhap ia ka hapoh ka bynta jinglynshop mariang.
Ka mat kaba ar ka long kawei na ki mat kaba kongsan bha ba ka Kynhun Myntri kala iatai la ong u Myntri Rangbah bad kata ka long halor ka jingpyndam noh ia ka interview na ka bynta ki Group D kiba pynlong lyngba ki DSC, kumjuh ruh ia ki Group C non- technical, hynrei na ka bynta ki Technical pat kan don hi ka interview ia kaba yn sa pynbeit ryntih daka Personal Department. Kane kan treikam naduh ka 1 tarik u Kyllalyngkot 2027 la pyntip u MR.
Ka mat kaba lai ka long halor ki SOP (Standard Operating Procedure) na ka bynta ki District Seclection Committee (DSC). Ia kane ka SOP dei ban bud ryntih da baroh ki DSC. Kine ki SOP kin sa trei kam ruh hadien habud ha ka jingthungkam ha ka lain Medical, Rural Development, Police Department bad ha kiwei kiwei ki rukom thungkam hapoh ka jylla.
Ka mat kaba saw ka long halor ka aiñ, jingithuh, ka jingpynrung kyrteng, ka jingiada bad jingshngaiñ jong ki nongtrei ba nabar jylla.
Ka mat kaba san ka long ban pyntreikam ia ki kyndon kiba don ha ka Meghalaya Flood Plain Zoning Act, 2026 bad kaba hynriew ka long halor ka pisa (Fund) kaba la bei sha ki District kiba la thaw thymmai bad ki bym shym la pyntreikam ia katei ka pisa haduh mynta. Ki don ar tylli ki District Headquarter ki bym shym la pyntreikam ia kane ka pisa ki long ka Resubelpara bad ka Mawkyrwat, hynrei ka Mawkyrwat ka la ioh ia ka jaka kaba 15 akar bad shongdor Rs.2.19 klur tyngka, la bthah ia ki bor pyniaid District ban leh ia kaba donkam.