U President ka Meghalaya Commercial Truck Owner and Drivers Association (MCTODA) Jaiñtia Unit u ma u Heibormi Pariat ula ong ‘ka jingïakhih jong ka seng ka khlem da pynthut ïaki shnong ki tnaw lane ïaka ïaid ka ïeng jong ki paidbah’, hynrei ula kren shai ba ka jingïakhih ka long kaba jai jai pyrshah ïa kitei ki Kharkhana Dewbilat ha East Jaiñtia Hills namar ka bym siew jong ki ïa ka dor bai kit katkum bala pynbeit da ka sorkar.
Kaba pynheh mysiem shuh shuh ïa ka seng mynta u ong kiba bun na ki kynhun treimon sngewbah kum ki sengbhalang kila wan shakhmat ban ai jingkyrshan ba pura ïa ka MCTODA ban bteng ïa kane ka jingïakhih ha ryngkat ki jingai sngewbha.
Ula ong ka seng kala sdang ïa kane ka jingïakhih naduh ka 27 tarik u Risaw kaba dang bteng haduh mynta ka sngi da kaba pynkynriah sha kawei pat ka jaka.
Shuh shuh ula ong ka seng MCTODA ka ïeng na ka bynta baroh ki trai bad ki nongñiah trok ka jylla bad kam don kano kano ka jingsngew ñiam.
Ha ka juh ka por ula kyntu ïa ki nongïalam shnong khamtam ki Waheh Shnong ba kin dei ban shah pynbor da ki jingbthah na ki bor pulit ban khang pynlong ïa ki jingïakhih ba jai jai hapoh ki shnong ki thaw jong ki, namar ka seng kaba jied ban pynlong khnang ha ki bynta ba kham kylluid ym ha ki jaka sor.
Kum ka seng kan bteng ïa kane ka jingïakhih haduh ban da urlong ka jingdawa, kaba long ruh ka lawei jong ki khun ki kti, ong u President.