Ka khubor Pulit ba la phah lyngba ka ophis u SP, West Jaiñtia Hills District, la ïathuh ba ki Pulit ka District ki la ioh ban kem ia ki 3 (lai) ngut ki samla kiba la suba jur ba ki donkti ban pyniap dusmon ia u (L) Damehi Mulieh (28 snem) u khun jong ka kong Durka Mulieh na ka shnong Ialong (Luti Tuber), West Jaintia Hills District, ha kaba ïa ka metïap jong u la ïoh ban tam na Khliehriat, EJHD ha ka 31-07-2026.
Ka khubor kala ïathuh ba ha ka 31 tarik Naitung 2026 ki Pulit ka Jowai ki la ioh jingtip ba kawei ka kali Maruti Alto K10 (Registration No. ML05 AG 0285) kaba dei jong u briew bym lah ban tip kala shah bat ha ki pulit ka Gumrah Police, Cachar District, Assam, ryngkat bad arngut ki briew kiba don ha katei ka kali. Mar mar ka kynhun Pulit na Phramer Traffic Cell, WJHD ka la leit hiar sha Gumrah, Assam, da ka jingiatreilang bad ki pulit ka thain, ki la kurup noh ïa katei ka kali bad ki la wanrah lem ïa kitei ki ar ngut ki briew na ka bynta ban pynlong ïa ka jingtohkit bniah.
Ha kajuh ka por na ka liang jong ki bahaïing jong utei u samla ba la khlad noh uba la ïoh ban tam ïa ka met jong u na Khliehriat ki la pyntip ba kane ka kali ka dei ka jong u (L) Damehi Mulieh. Ha ka jingiadei bad kane la register ia ka mukotduma tuh kali bad pyniap briew katkum ka Jowai PS Case No. 56(07)2026 katkum ki kyndon 103(1) bad 140(1) jong ka Bharatiya Nyaya Sanhita (BNS).
Katkum ka jingphla jong kitei ki ar ngut kiba la shah kem kiba kynthup ïa u Dapjingkmen Paslein (26 snem), na ka shnong Lakasein, East Jaiñtia Hills District. bad u Samuel Iakai (25 snem), na ka Shnong Umkyrpong, East Jaiñtia Hills District, ki Pulit kila ïoh ruh ban kem mynta ka sngi (4-8-2026) sa ïa u Duniwankmen Sutnga (26 snem) na ka Shnong Khaidong, East Jaiñtia Hills District.
Ia kine baroh lai ngut la leit ialam sha ïingbishar bad ka jingtohkit ïa ki ka dang ïaid shakhmat.
Na ka liang jong ki Pulit ka West Jaintia Hills kila pynpaw ka jingsngewnguh ïa ka jingïatreilang bad ka jingai jingtip ba biang por jong ki Pulit ka Gumrah, Assam kaba la ïarap ban ïohkem ïa kine ki suba donkti pynïap briew bad tuh kali.
Ha ka juh ka por ki Pulit ka West Jaintia ki la buh ka jingkyntu ia ki nongshong shnong ba kin long kiba husiar bad syndong bha ïa ki kali motor jong ki. Lada kano kano ka jingsuba jong ki kam tuh kam thiem jong ki runar dei ban pyntip mardor da kaba phone ha u number toll-free Police Emergency Helpline 112.