Ka long ka sien jam kaba donkam bha ha ka jingiadei bad ka jingiada ia ka wah Myntdu, ha kaba na ka liang ka ophis trei kam jong ka sorkar kaba kynthup ia ka ophis Range Forest Officer Jowai Range (T) Jowai bad ka Divisional Fores Officer, Jaintia Hills Territorial Division Jowai, la iohi ba ki la dep ban buh da ka Sign Board ne jingmaham pyrshah ia kino kino ki briew kiba don bynta ha ka ban khlong ne tih maw tih shyiap na rud bad napoh jong ka wah Myntdu.
Kawei na kine ki sign Board la iohi ba kitei ki ophis sorkar ki la pynieng ha rud jong ka thwei Mulieh jong ka wah Myntdu kaba don harum jong ka Jingkieng Nar, kaba dei kawei na ki jaka jong ka wah Myntdu kaba jur bha ka jingtih bad khlong maw khlong shyiap. Namar ka jingtih maw tih shyiap na rud bad napoh jong ka wah, ka wanrah ia ka jingsniew dur ka jingpynjot ia ka jinglong tynrai jong ka wah ka pynduh bad pynsniew ruh ia ki krem ki kroh ne ki jaka shong jaka sah jong ki dohkha doh pnat, kiwei de ki jingim hapoh jong ka wah bad kiwei kiwei de ki jingpynsniew ia ka jinglong kyrpang jong ka wah.
Kumba long mynta la iohi ba bun ki jaka ha shi lynter jong ka wah Myntdu ki la sniew dur lut tang na ka daw jong ka jingtih maw bad khlong shyiap pathar jong ki briew baroh shi katta. Kumta kane ka jingkhang ban khlong maw bad khlong shyiap jong kitei ki ophis sorkar ka long kaba donkam haduh katta katta na ka bynta ka jingbha jingmiat jong ka wah Myntdu kaba ai um bam um dih ia briew ka nongbah Jowai bad ia kiwei de, ym tang ba ka wah Myntdu ka ai bad bsa ia ka umbam um dih hynrei ka ai um ruh ia ki jaka rep jaka riang jong ki nongrep ha shi lynter jong ka.
Kumta kane ka sien jam jong kine ki ophis sorkar ka dei ban treikam da kaba tyngeh, da kaba phah peit pyrman bad peit bniah ioh dang don ki briew kiba leh pyrshah ia kane ka jingmaham ne ka aiñ bad dei ban pyntrei hok ia kane ka jingmaham bad pynshitom ia kiba leh pyrshah, kumba la thoh ha kane ka sign borad, khnang ba ka jinglong kyrpang jong ka wah Myndu kan neh kan sah. La dei ruh ban buh shuh shuh ia kum kine ki signboard ne ki jingmaham ha kiwei de ki jaka jong ka wah kiba ki briew ki juh khlong ia u maw u shyiap na kane ka wah.
