Ka Shangpung Elaka Youth Farmers Union ka kyrpad jur ïa baroh ki nongkhwai, ki nong saitjaiñ bad kumjuh ïaki nongrep ba kim bit ban bret pathar ïaki plastic ha shi lynter jong ka Wah Umiurem, khnang ba kane ka wah ka long kaba khuid ba suba.
Shuh shuh la pynsngew katkum ka jinglong jingman mynta kane ka wah Umiurem kala jakhlia shaba palat na ka jingtuid ki plastic bad ki jaiñ khunlung kum ka huggies diapers.
Halor kane ka seng ka kyrpad jur ïaki nongkhwai, ki nongrep bad ki nongsait jaiñ ba kin nym bret pathar ïaki plastic sha ki bynta ka wah, namar lyngba kane ka wah Umiurem la pyndon ïa ka umbam umdih na ka bynta ki shnong ba kynthup ïa ka shnong Pasyih, Thad Muthlong, Shangpung, haduh Raliang bad ïa ki shnong kiba don sharum kane ka Wah.
La pynsngew ruh na kane ka jingbret pathaw ïa ki jakhlia kala ktah ruh ym tang ïa ka wah Umiurem hynrei kala ktah ruh ia ka wah Ialip bad ka wah Umpyai, kumta ka Shangpung Elaka Youth Farmers Union ka khot ïa ka jingïatreilang ban pynim bad ban pynbha pynmiat ïa baroh ki wah hapoh ka Elaka.