U Deputy Commissioner ka East Khasi Hills District u Abhilash Bharanwal, IAS haba kren sha ki lad pathai khubor ha ka 23 tarik Nailar u la pyntip ka jingiaid pahara kan dang iaid beit ha Nongbah Shillong tad haduh ban da wan biang ka shongsuk shongsaiñ na ka bynta ka shong suk shongsaiñ ki paidbah bad ka kamram jong ki bor pyniaid district ka long ban wanrah ia ka shongsuk shongsaiñ na ka bynta ki paidbah jong ka East Khasi Hills bad kumjuh ha Nongbah Shillong.
Nalor kata u la kyntu ruh ia ki nongjngohkai pyrthei ba kin wan sha ka Jylla bad ka long ka jaka kaba shngaiñ bad ym dei ban ong ba tang jia kawei ka jingjia ka Shillong kam long shngaiñ namar ka Jylla ka dei kawei kaba khring bha ia ki nongjngohkai pyrthei bad ki paidbah ki pdiang sngewbha ia ki nongwanjngohkai sha kane ka Jylla.
Khatduh u la ong ki bor pyniaid district kim ai jingbit ia ka KSU ban pynlong ia ka jingshong kyllaiñ myngngor hajan u Mot Kiang Nangbah, ia kaba ki la thum ban pynlong ha ka 24 tarik mynta u bnai ha nongbah Shillong.