U Symbud Myntri Rangbah ka Jylla u Ma Sniawbhalang Dhar ha ka 23 tarik Nailar 2026 u la khot ia ka jingialang ba kyrkieh bad ki ophisar ka tnad transport, ki heh Pulit, ki Deputy Commissioner ka East Khasi Hills bad Ribhoi District bad kumjuh ruh ia ki tourist Taxi Association bapher bapher kiba don ha ka Jylla bad kumjuh kiba kamai sha Assam hadien ka jingmih ka jingkhang Kali tourist bad kumjuh ka jingshah pynwit ki Kali tourist kiba kamai sha Assam.
Haba kren sha ki lad pathai khubor na ka liang u Ma Sniawbhalang Dhar u la pyntip ba ka jingialang mynta ka sngi ka long kaba seisoh bad haduh lai kynta tam la shim ia kawei ka Rai bad ka Rai ka long ba ha ka 10 tarik Nailur kan sa don biang ka jingialang bad ki ophisar ka tnad transport ba kynthup ia u Commissioner ka tnad Transport ka Assam bad kumjuh u Commissioner ka tnad transport ka Jylla bad kumjuh ki tourist Association na Assam bad kumjuh na Jylla Meghalaya na ka bynta ban ia pynbeit noh ia kine ki jingeh baroh kiba ki nongniah tourist ki iakynduh jingeh na ka por sha ka por.
Nalor kata u la ong ka jingleit jingwan kan long biang kumjuh kumba ju long haduh ka 10 tarik Nailur 2026 haduh ban da long biang ka jingialang bad khmih lynti ruh ba ka jingialang kan long kaba seisoh ha baroh ar tylli ki Jylla khnang ban long biang kumba ju iaid ha kine ki ar tylli ki jylla hapdeng ka Assam bad Meghalaya.
Haba iadei bad ka jingshah pynjulor ki Kali Assam bad ki Kali Meghalaya ka Sorkar kan sa shimkhia katkum ki kyndon aiñ la ong u Ma Sniawbhalang Dhar.
