Ki dkhot jong ka liang pyrshah (Opposition) ha Jaiñtia Hills Autonomous District Council (JHADC), kiba kynthup ïa phra ngut ki MDC na ka VPP bad ar ngut na ka Congress, mynta ka sngi 3 tarik Nailar, kila leit ïakynduh ïa u Chief Executive Member (CEM), ka JHADC u ma Thombor Shiwat ban dawa ba dei ban don ka jingsam kaba hok ïa ki skhim jingïarap paidbah hapoh ka 16th Finance Commission, da kaba kynnoh ba don ka jingïapher kaba bun ïa ki MDC ka liang pyrshah.
Ki dkhot ka liang pyrshah kila ong ba kim shym la dawa ban ïoh jingïasam kaba long kumjuh thik bad ka liang synshar (Ruling), hynrei ki khmih lynti ba ki skhim ba wan na ka Sorkar Pdeng dei ban sam katkum ka jingïaryngkat bad ka jingdon bynta jong baroh ki MDC. Ki la ong ruh ba baroh ki MDC ba la jied da ki paidbah ki mihkhmat na ka bynta ki paidbah jong ki constituency jong ki bad kumta ki dei ban ïoh ïa ki lad jingïarap (Scheme) na ka bynta kaba hok jong ki.
Da kaba pynpaw ïa ka jingsngewkhia halor ka pisa kaba kot ₹.28.5 klur ba la mynjur hapoh ka 16th Finance Commission, ka liang pyrshah kala kynnoh ba ki 10 ngut ki MDC ka liang pyrshah ki la ïoh tang ₹20 lak marwei, katba ïa ka pisa kaba sah la mang sha ki 19 ngut ki MDC ka liang Synshar, kiba la ïoh kumba ₹1.36 klur marwei. Ki la ong ba kane ka jingïasam ka long kaba noh shiliang palat.
Ki dkhot ka liang pyrshah ki la kdew ruh ba ha Khasi Hills Autonomous District Council (KHADC), ka VPP kaba synshar kala sam ïa ka pisa jong ka 16th Finance Commission ha ka rukom kaba ïa ryngkat hapdeng baroh 29 ngut ki MDC ba la jied paidbah. Ki la buh jingkylli balei ba ym lah ban bud ïa kajuh ka rukom ha ka JHADC.
Ka liang pyrshah kala dawa ba man uwei pa uwei u MDC jong ka liang Pyrshah un dei ban ïoh ₹50 lak bad kala kyrpad ïa ka Executive Committee ba kan pyntip da ka jingthoh sha u Leader of Opposition shuwa lane ha ka 4 tarik Nailar.
