Ki ‘riewngeit Niam Hindu hynne ka sngi ka 2 Risaw 2025 ki la pynkut noh ia ka jinglehniam jong ki ha kylleng ka Jylla ha kaba la sakhi ruh ia ka jingleit bret blei jong ki ha ki bynta ka wah Umkhrah kaba don ha Polo, Shillong kaba dei ruh ka dak bad ka jingngeit jong ki ba baroh ki jingthaw bad ki jingpynlong kin leit phai sha ka tyllong ne ka jaka ba ki wan.
Ka jingleit bret blei tang ha ka Nongbah Shillong ka la poi haduh 70 tylli ki dur blei ha kaba la sakhi ruh ia ka jingtuid jong ki ban bud ia ka dur blei ia kaba la kit ha ki kali na ki jaka kiba na kylleng kiba don ha sor. Katei ka jingmih ryntih jong ki wat hapdeng u slap uba la neh baroh shi sngi ka la pynlong ruh ia ki bor pulit ban khang ia ki kali ban iaid ha ki thaiñ polo ha katei ka kynta bret blei na ka bynta ban pyntikna ia ka jingshngaiñ bad ban lait na ka jingdheng bad ka jingiatyngkhuh.
