Ka Kyrmen Foundation, ha ka sien ba ar ha une u bnai, ha ryngkat bad ka Khasi Students’ Union (KSU) RIST-USTM Unit, ka la pynlong ïa ka Voluntary Blood Donation Camp ha USTM Block D, PIMC mynta ka sngi (10.09.2026).
Ïa kane ka prokram la pynlong da ka Kyrmen Foundation ryngkat ka KSU RIST-USTM Unit, bad la ïatreilang ruh bad ka KSU NEIAH Unit, USTM, Meghalaya State Blood Transfusion Council (MSBTC) bad NEIGRIHMS Blood Centre.
U Bah Kyrmen Shylla, MLA ka Khliehriat Constituency, u la long u Kongsan jong kane ka prokram. Ha ka jingdonlang jong u, la ïadon bynta ruh u Chancellor ka USTM, u Mahbubul Hoque, Vice Chancellor ka USTM, Prof. G. D. Sharma, Director bad Principal ka PIMC, ryngkat bad kiwei ki nongpynïaid jong ka USTM bad PIMC.
Ha kane ka prokram la ïadonlang ruh ka Programme Manager jong ka Meghalaya State Blood Transfusion Council, ki nongïalam bad dkhot jong ka KSU na ki ar tylli ki Unit, ryngkat bad ki nongïalam bahakhmat jong ka Kyrmen Foundation.
Ïa ka Blood Donation Camp la sdang da ka jingpynshai paidbah (Awareness Programme) na ka liang ka ophis jong ka Meghalaya State Blood Transfusion Council, kaba pynshai halor ka jingdonkam bad ka jingkordor jong ka jingïarap da kaba ai snam mon sngewbha.
Ha kane ka camp, haduh 69 ngut ki nongai snam mon sngewbha ki la wan ban register, bad na kine, 40 ngut ki la lah ban ai snam mon sngewbha.
Ka Kyrmen Foundation bad ka KSU RIST-USTM Unit ki pynpaw ka jingsngewnguh ïa baroh kiba la wan ban ïashim bynta bad ai ka jingïarap lyngba kane ka prokram. Ka jingai snam mon sngewbha ka dei kawei na ki lad ba kordor ban ïarap bad pynim ïa kiwei kiba donkam ïa ka snam.
