U Information Secretary jong ka Jaintia Coal Owners, Miners, Suppliers and Workers Association (JCOMSWA), u Bah Overcome Dkhar, haba kren sha ki lad pathai khubor mynta ka sngi halor ka jingïalang kaba dang shen ba la khot da ka ophis u Deputy Commissioner bad ki nongmihkhmat bapher bapher.
U Bah Dkhar u la ong ba ka jingïalang ka la long ha ka 9 tarik u Nailur, ha ka por kumba 11:30 mynstep, ha ka ophis u Deputy Commissioner jong ka East Jaintia Hills District. Ha kane ka jingïalang ki la donlang u Assistant Commissioner, u bah F. Passah, ki nongmihkhmat jong kawei pat ka seng ki trai dewïong, ki Rangbah Shnong na East Jaintia Hills District, bad ki dkhot jong ka JCOMSWA.
Ha ka jingïalang, ka JCOMSWA ka la pyrshah ïa ka jingtyrwa jong ka Sorkar ban pynïaid ïa ka kam tih dewïong lyngba ki Co-operative Societies. Ka seng ka la pynpaw ba kane ka rukom treikam ka lah ban pynduh ïa ka hok jong ki trai jaka halor ki jaka jong ki katkum ka Sixth Schedule jong ka Riti Synshar ka Ri India. Ka seng ka la kdew ruh ba bun na ki trai jaka ha kane ka thaiñ ki dei ki nongrep.
Ka JCOMSWA ka la pynskhem biang ba ka kam tih dewïong ha ka District ka dei ban sdang biang kumba la ju pynïaid mynshwa, hynrei hapoh ki kyndon kiba biang ban ïada ïa ka mariang. Katkum ka seng, ki nongmihkhmat jong kawei pat ka seng ki trai dewïong bad ki Rangbah Shnong ruh ki la kyntait ïa ka jingtyrwa ban pynïaid ïa ka kam tih dewïong lyngba ki cooperative societies. Ki la kyrshan ïa ka jingpynphai biang ïa ka kam tih dewïong katkum ka rukom treikam kaba mynshwa, hynrei da kaba bud ïa ki kyndon kiba biang.
U Bah Dkhar u la ong ba haba la wanrah ïa ka jingtyrwa ban thaw ïa ka co-operative society na ka bynta ka kam tih dewïong, ka JCOMSWA ka la pyrshah mardor. U la ong ba ka Meghalaya ka la ju bud da ka rukom long trai jaka marwei, ym da ka rukom kaba pynïaid lyngba ki society. Na kane ka daw, ka seng kam shym pdiang ïa ka jingtyrwa ban pynïaid ïa ka kam tih dewïong lyngba ki co-operative societies.
U la kyntu ïa ka District Administration ban thoh sha ka Sorkar Pdeng ban kyrpad ba yn shah ïa ka kam tih dewïong ha ka District katkum ka rukom long trai jaka kaba la ju bud tynrai da ki paidbah ka Meghalaya.
Ha kaba kut, u Bah Dkhar u la ong ba u Assistant Commissioner F. Passah un sa pynsngew sha ki bor ba halor halor ka jingpyrshah jong ka seng ïa ka rukom pynïaid ïa ka kam tih dewïong lyngba ki Co-operative Societies.