U Myntri Rangbah ka Ri u Narendra Modi ula pyndonkam tang ar tylli ki kali kiba kynthup kawei ka Range Rover bad kawei kaba bud ïa u ka Toyota Fortuner haka jingïaid lynti jong u mynta ka sngi ha nongbah Delhi.
Ïa u Myntri Rangbah duh ka ri la ju pyndonkam haduh kumba 12-15 tylli ki kali kiba synran ïa u ha ryngkat ki kali escort, kali Ambulance, ki kali Jammer Unit nalor kiwei kiwei de.
Na ka liang u Modi hynnin ka sngi ula kyntu ïa ki paidbah nongshong shnong ka Ri ha jingïalang ha Hyderabad, hadien bala mih ka jingeh ha ki bynta ka West Asia bad ka jingthut ka rukom pynpoi ïa ka umphniang bad ka tyndong lyer ban pynduna noh ïaka rukom pyndonkam ïa ka umphniang (Petrol & Diesel) hapoh ka Ri.
Nalor kata ula kyntu ruh ïa ki nongshong shnong ban ïaleh ban trei na ïing bad ka rukom ai jinghikai Online Class ïa ki khynnah skul, ban pyndonkam noh da ki metro bad kali electric (Bus) bad ban kiar na ki jingleit shabar khlem da donkam eh.
Ïa kane ka jingkyntu u Myntri Rangbah duh ka Ri na ka liang kiba bun ki myntri jong ka sorkar kmie kila pynduna ïa ki kali (escort) haka leit ka wan jong ki.
