Ka North Eastern Council (NEC) kaba dei kawei na ki tnad hapoh ka Ministry of Development of North Eastern Region (MDoNER) jong ka ri India kaba peit ia ka roi ka par jong k thaiñ shateilam mihngi, dang shen kala ioh lad ban theh ia ki lad jingiarap sha ka Jylla Meghalaya kaba la kot shaduh Rs.28.08 klur tyngka tang naduh u bnai Naitung haduh Nailar 2026.
Ka NEC ka la pyllait ruh Rs.7.86 klur tyngka ha kaba iadei bad ka jingpynbha ia ki jaka pule, ki jaka sumar, ki kam jngohkai bad kiwei ki jingtrei kiba iadei bad ka imlang sahlang.
Ban pynbha ia ka pule puthi hapoh ka Jylla ka NEC ka pyllait pisa Rs.4.90 klur tyngka, na ka bynta ban shna ia ki ïingskul kiba long katkum ka juk ba mynta ha ki 8 (Phra) tylli ki skul Ramakrishna Mission (RKM). Kine ki skul ki don ha Laidiengsai, Nongkynrih, Mawrah, Pomsohmen, Laitryngew, Wahlong, Nongjri Pynursla bad Nartiang.
Na ka bynta ka jingkyntiew ia ki kam kamai jakpoh jong ki samla bad ki longkmie riewlum da ka jingsengkam lajong bad ruh ha ka kam rep kam riang ka NEC kala pyllait Rs.2.50 klur tyngka ha ka jingpyntrei ia ka Integrated Entrepreneurship and Livelihood Centre kaba la mang pisa haduh Rs.10.00 klur tyngka ban pyndep.
Na ka bynta ki Sartup Ecosystems ka NEC kala pyllait pis Rs.1.17 klur tyngka ban pynbha shuh shuh ia ki 7 tylli ki PRIME HUBS kiba don ha kylleng ki bynta jong ka Jylla.
Ha ka jingiadei bad ka jingkyntiew ia ki kam jngohkai ka NEC ka la pyllait pisa Rs.46.50 lak tyngka sha ka jingpynbha ia ka jaka jngohkai kaba don ha Laitlyngkot (Lamlyer).
Katto katne ki project kiba la dep ban pyntrei pura katkum ka jingbei pisa jong ka NEC ki kynthup ia ka ‘Ecological Harmony’ kaba don ha Ri-Bhoi. Ka jingthmu jong kane ka projek ka long ban iada ia ka jingtuid khyndew, ka jingpynneh pynsah ia ki tyllong um bad ka jingpynneh ia ki khlaw ki btap. Ia kane ka projek la bei pisa Rs.2.94 klur bad la pyntrei ia ka da ka ophis u Deputy Commissioner, Ri-Bhoi. Ia kane ka projek la pyndep ha ka 6-07-2026.
Ha ki kam jingpynkoit pynkhiah ka NEC kala pynioh ia ka Advanced 1.5 Tesla MRI Machine ha Tura Civil Hospital kaba kot sha ka Rs.6.69 klur.
Ka jingpynioh jinghikai ia ki nongshong shnong ban tip ban pyndonkam ha kaba thaiñ jingthaiñ ne pyndonkam ha ki wei de ki rukom ia u jingthung ba mih ha sla um uba la tip kum u ‘Water Hyacinth’. Ia kane ka projek la lah ba pyndep ha ka jinglut kaba Rs.368.69 lak tyngka kaba la pyndep ha ka 25-08-2026.
Ka jingshna pynbha ia ki Class room jong ki skul RKM kiba don ha Jalaphet, Laitlyngkot, Laitlyndop, Mylliem, Umploh bad Mawkynrew kaba kot sha ka Rs.13.14 klur tyngka ia kaba la pyntrei hapoh ka Focused Development of Deprived Areas program.
Nalor kine ki project ka NEC kala pynioh jingiarap ruh sha ki jaka ai jinghikai kum ki Regional Agencies, ki Universities bad ki Technical bodies, ba kynthup ia ki prokram jong ka IIM, Shillong, ki prokram ban pyniohkam ia ki samla (Placement proram) bad kiwei kiwei kiba la kot sha ka Rs.16.22 klur tyngka.