Ka Khasi Student’s Union (KSU) South West Khasi Hills District ka la pynpaw ïa ka jingpyrshah kaba jur halor ka jingthmu ai jaka u Syiem ka Hima Maharam sha ki shipai BSF hajan ka Wah Photmula kaba dei ka surok main road Ranikor Khatpra, Photkroh, Shillong bad kaba dei ruh ka jaka kaba ju rep ju riang da ki Khasi kiba dei ki khun ki hajar jong ka Hima Maharam.
U samla Forwardman Nongrem, President KSU SWKHD haba kren sha ki lad pathai khubor u la ong ba ka seng hadien ba ka la don ka jingpynsngew na ki khun ki hajar ka Hima Maharam ba sah sha kito ki thaiñ, kum ka seng kaba peit ia ka bha ka miat jong ki paidbah ka pynpaw ïa ka jingpyrshah kaba jur lada ka Hima kan iaid shakhmat ban ai jaka ia ki shipai ha kito ki thaiñ.
U samla Forwardman Nongrem u la ong ruh ba “Ka khyndew Hima kam dei ka nongkynti shimet jongno jongno, U syiem bad ka Dorbar Hima ki dei tang ki nongpeit nongkhmih bad ym kita kiba lah ban die ban bynda katba mon ïa ka jaka ka bym dei ka nongkynti shimet jong ki khamtam ban leit aiti sha ki shipai.”
Kumta ha kaba iadei bad kane, ka seng ka dawa na u Pa’iem Niandro Syiemiong bad ka Dorbar ba ki dei ban pynsangeh noh mardor ïa ka tei ka jingrai ban ai jaka sha ki shipai.
U la bynrap ruh ba ka jingai jaka sha ki shipai kan sa ktah ïa ka shongsuk shong saiñ jong ki paidbah kumba la ju ïohi teng, artad ba kane ka jaka ka ïajan bad ka shnong Photeitsim bad kaba dei ruh ka jaka rep jaka riang jong ki Khasi.
Ym tang katta u samla Forwardman u la ong ruh bad kane ka jaka ba mut ban ai sha ki shipai ka don ia ka wah bad ki kshaid ba itynnad kaba lah ban kyntiew ia ka kam jngoh kai ha kane ka thaiñ.
U samla Forwardman Nongrem u la ong ruh ba la da u syiem bad ka Dorbar hima ki kwah ban ai jaka, kidei ban ai bad ki jaka ba ïajan ka jingker sainar bad ka Bangladesh ym ban ai sha ki jaka ba la kham pajih namar lada ai lei u shipai u kwah jaka wat ha Mawkyrwat ruh.
Kumta ka seng ka la maham jur ia u Syiem bad ka Dorbar hima ba ki dei ban weng noh ïa katei ka rai ban ai jaka ia ki shipai lym kumta ka seng kam banse ban shim da kiwei ki sien jam kiba tyngeh.