Mynta ka 2 tarik, October 2023, ka Panaliar Khynroo Khyllood Welfare Organisation (PKKWO), Panaliar Jowai, kawei na ki tnat treikam ka Dorbar Chnong Panaliar, ka la pyndon burom ia ka sngikha u Mahatma Gandhi kum shibynta jong ka campaign Swachhata Hi Seva, da kaba pynkhuid ia ka shnong hi baroh kawei. Ia kane ka jingpynkhuid shnong, lasdang naduh Yungwalieh, ha ka jingiadonlang u Waheh Chnong, ma Riquoma Rq. Laloo ryngkat bad u Careme Phawa, General Secretary ka shnong bad katto katne ngut ki dkhot rangbah ka shnong. Ha shuwa ban sdang ka jingiapynkhuid, ladon ka jingialang lyngkot ba la pyniaid da u Wombai Sumer ba long u President ka PKKWO, laioh ia ka jingkren lyngkot na u Waheh Chnong bad ki kyntien ai khublei na i bah Arwanki L. Laloo, Secretary, PKKWO.
U Waheh Chnong u la ong ba, ka khuid ka suba kadei kawei kaba donkam tam ha ka jingim briew ka jong ngi. Ngi dei ban lehkhuid ialade, ka iing ka sem, ki lynti syngkien, hangta ngin ioh ia ka jingkhuid jong ka shnong baroh kawei. U khot ia ka jingiatreilang jong baroh ki nongshong shnong, ki nongleit nongwan na ka bynta ka khuid ka suba, ha kajuh ka por u kyntu ia kiwei ba kidei ban tip ba ka shnong kadon ka bor ba hakhliehduh ia kano kano ka kam hapoh u pud u sam jong ka.
Hadien ba ladep pynkhuid na Yungwalieh, ka kynhun ka la leit sha ki bynta wa ker sawdong ia ka Maternity & Children Hospital, kaba don hapoh u pud u sam ka shnong. Ka jingpynkhuid shongshit ki longkmie bad kiwei pat ki dkhot shynrang, ka la pynlong ban dep kloi ban pynkhuid ia katei ka jaka. Hangne, ha kapor ba lasdang ban pynkhuid ia ki bynta ba hakhmat gate ka MCH, la iamih ruh ki nongtrei jong ka MCH ban iatrelang. Lawan iashimbynta naduh u Medical Superintendent Dr. Ebenezer War, ka Nursing Superintendent bad kiwei de ki nongtrei jong ki tnat bapher bapher ka Hospital.
La ioh biang ia ka jingkren na u Waheh Chnong, uba la khot ia ka jingiatreilang jong baroh kiba wan sha kane ka Hospital, naduh ki nongpang, ki nong ap ia kiba pang, kiba wan peit nongpang bad kiwei na ka bynta ban tip ban lehkhuid ia ka Hospital. U khot u wer ia ka jingiatreilang ki Local Taxi, kiba don manla ka sngi ha kane ka jaka ban peit bad ban kren ia kino kino kiba leh jakhlia.
U Medical Superintendent, ha ka jingkren ka jong u, u la kyntu ia baroh kiba wan sha ka Hospital ba ki dei ban tip ba kane kadei ka Hospital ka jong ki hi. Ymbit ban leh jakhlia ia ka, kidei ban lehkhuid namar na kane hi ka wanrah ia ki bunjait ki jingpang lada ngim tip ban husiar. U la ai khublei ruh ia ka shnong Panaliar baroh kawei ia ka jingkloi jong ka, ban iatreilang ha kino kino ki kam ba ka Hospital ka donkam.
Ka shnong Panaliar, ka labuh ka jing maham kaba jur, ia kino kino kiba pynjakhlia ia ki talawiar jong ka MCH bad ruh ia kino kino kiba noh jakhlia shapoh u pud u sam ka shnong. Lada lap ia kine, ka shnong kan pynshitom ryngkat bad ka kuna ka ba heh.
