(Bah M.M.Thaiang)
Ka Annual Youth Convention kaba XVI jong ka Jowai Diocese Catholic Youth Movement kaba lai sngi, kaba la sdang naduh ka 12 tarik January 2024 ha Madan Ialehkaibol ka Marianhill Higher Secondary School, Jowai ka la kut hynnin ka sngi 14 tarik January 2024, ha kaba la wan iashim bynta da kumba arhajar laispah ngut ki khun samla jong ka Balang na ki khatphra tylli ki Parish jong ka Jowai Diocese.
Ha kane ka Youth Convention kaba lai sngi, ki samla ki la shim ia ka ktien maitphang na ka bynta ka snem 2024, kaba la shim na ka Shithi jong u Paul Apostol sha ki Ephasus 6:1 “PHI KI KHUN TO KOHNGUH IA KI KMIE KI KPA JONG PHI HA U TRAI”. Ha ka jingkylla jong ka juk, ka jingiaid jong ka por, ka juk bad ka por jong ki kor ki bor (Science & Technology) ki khun kiba la nang la stad i kumba kim burom bad kohnguh shuh iala ki kmie ki kpa kiba duna ka jingnang jingstad bad halor kane ka jingiohi kaba byrngut byrnget, ki samla Shynrang & Kynthei ha kane ka Youth Convention jong ki, ki la shim halor kane ka mat “ Phi ki khun to kohnguh iala ki kmie ki kpa jong phi ha U Trai”.
Ha kane ka Convention kaba laisngi, ki Samla, ki la ioh ia ki kyntien kren sneng kren kraw bad kyntu kynpham kiba sngewtynnat bad kiba dung haduh khlein shyieng bad ki ban pynsah kynmaw na ki Nongsharai mynsiem jong ki kum na u Rev. Fr, Simeon Sungoh, Rev. Fr. John Mikhel Marboh bad na kiwei de ki Nongsharai mynsiem.
Shwa ban pynkut ia kane ka sngi la pynlong ia ka jingknia Mas Iukharist, kaba la lamkhmat da u Most.Rev. Ferdinand Dkhar d.d. Bishop ka Jowai Diocese ha ryngkat ka jingsynran lang ki Lyngdohsohblei kiba la ia wan synran ia ki khun samla na ki Parish bapher bapher jong ka Jowai Diocese.
U Most Rev. Ferdinand Dkhar, ha ka sneng ka kraw bad kyntu kynpham ia ki khun samla jong ka Diocese u ong kumba ki samla ki la shim ia ka maitphang na ka bynta ka snem 2024 “ Phi ki khun to kohnguh iala ki kmie ki kpa kum ha U Trai”to long ki samla kiba kohnguh sneng iala ki kmie ki kpa bad kiba tieng burom ia U Blei nyngkong eh. Nangta u ong ban tieng burom ia U Blei bad ban kohnguh ia ki kmie ki kpa ka mut ban kohnguh ia ki hukum jong u Blei bad ia ki kmie ki kpa bad haba ngi kohnguh ym tang da ki ktien hynrei da ki kam kyntu bad pynkut u Bishop Ferdinand Dkhar.
Hadien ka jingmane Sakrament bad kyrkhu ia ki paidbah da ka Sakrament bakhuid tam ka Duwan, shwa ban pynhiar ia ka Lama jong ka Seng (Jowai Diocese Catholic Youth Movement) da u ma Wailadmiki Shylla MLA uba long ruh u MLA ka 2 Jowai Assembly Constituency, la don ka cultural programe ki ba pynbyrngia ia ki samla bad ia ki paidriewngeit kum ka “Khasi Gospel Dance, na ka Parish Khliehriat, ka Shadpliang & Shad-sahep na ka Jowai Parish, ka Shad Rongkhli na ka Parish Amlarem bad kiwei de ki ruwai ki siaw tynrai kiba don jingmut bad kiba shoh mynsiem.
U Ma Wailadmiki Shylla MLA, uba long u kongsan ha kane ka sngi, haba ai ki kyntien sneng kyntien kraw ia ki khun samla jong ka Jowai Diocese, u ong ba um kwah ban kren jrong naba ki samla ki la ioh ia ka sneng ka kraw bad ka jingkyntu kynpham na ki Nongsharai mymsiem kaba ki la ioh ha kine ki laisngi lynter (12-14 January 24). La katta ruh u ong ba donkam ban pynkynmaw ia ki samla naba bun sien ki jingbha lane ki jingsniew ki mih na ki samla. Nangta u ong “Ko samla to kiar na kaba sniew bad to leh ia kaba bha, im ka jingim kaba bha kaba miat, to tei ia ka lawei ka longiing longsem kaba neh kaba skhem ban bha ban miat ka longbriew man briew ha ka burom ka akor ha ka jaitbynriew bad ha khmat ka pyrthei.
Khatduh eh shwa ba un pynkut ia ka jingkren u ma Wailadmiki, MLA haba jubab ia ka Memorandum kaba ki samla ki la ai ha u, u la ai arlak tyngka na ka bynta ba kin sdang ban shna ia ka Ophis treikam jong ki ha Lumbihsyntu, Bishop’House bad na ka bynta kane ka jingthmu jong ki samla ka Jowai Diocese ban tei ia ka Ophis treikam jong ki, ki la ioh ruh ia ka jingiarap kumba lai-lak tyng na u Ma Vincent H Pala uba long ruh u MP jong ka Shillong Parliamentry Constituency. La pynkut ia kane ka sngi da kaba u ma Wailadmiki Shylla uba long u kongsan, u la pynhiar ia ka Lama jong ka Seng.
