Ka ophis jong u Chief Electoral Officer (CEO) ka jylla Meghalaya ka la pynmih ia ki jingpyntip paidbah na ka bynta ban pynsuk ia ki nongthep vote jong ka jylla haba ki leit ban thep ia ka vote jong ki ha kane ka 19 tarik mynta u bnai, kaba dei ka jingthep vote sha ka ïing Dorbar jong ka Lok Sabha.
Ha kane ka jingpyntip la batai shaphang ki kot ki sla kiba donkam ban rahlang khnang ban ioh pynshisha ia ka kyrteng jong u ne ka nongthep vote haba ki leit ban thep ia ka vote jong ki ha ki Polling Station.
Kine ki kot ba donkam ba ki nongthep vote ki lah ban rah lang ki kynthup ia kawei na kine, kata ka Election Photo Identity Card (EPIC), ka Passport, ka Driving Licence, ka Service Identity Card kaba don lang bad ka dur kaba pynioh da ka sorkar pdeng lane sorkar jylla lane ki company ba ki trei, ka Passbook kaba don bad ki dur ba ai da ki Bank ne ka Post Office, ka PAN Card, ka Smart Card, ka MNREGA Job Card, ka kot Pension, ka official Identity Cards ba ai da ki MP lane ki MLA, lane da ka Adhaar Card.
Lyngba kawei na kine ki kot ba donkam ba ki nongthep vote ki wan rah lang, ki nongpyniaid jong ka elekshon ha ki Polling Station bapher bapher kin hap ban shah ia u ne ka nongthep vote ban ioh pyndep ia ka hok thep vote jong ki.
