-Yn hap ai jubab u DGP ka jylla hapoh 15 sngi-
Ka Meghalaya Human Rights Commission (MHRC) lyngba ka khubor ba la pyllait da u Secretary mynta ka sngi, ka la pynpaw ba kala shimti hi dalade ia ka jingjia halor ka jingshahtait shnong jong kawei ka longkmie ha ka Dorbar Shnong Lumlakhiat, West Jaiñtia Hills District.
Ka MHRC ka la shimti ia kane ka jingjia lyngba ka jingmih khubor ha u kot Khubor Mawphor Dated 16th April 2024 (Tuesday), kaba la kdew ia ka jingshahtait shnong jong ka wei ka longkmie ka kong Meloris Dhar ha ka Dorbar Shnong Lumlakhiat.
Ha kaba iadei bad kane na ka liang ka Commission kala ai da ka jingthoh (Notice) sha u Director General of Police (DGP) ka jylla Meghalaya ba u hap ban ai ia ka kaiphod (Detailed Report) hapoh 15 sngi sha ka MHRC.
Kum ban shu pynkynmaw ba kane ka jingshahtait shnong jong katei ka longkmie kala jia naduh ka 9/10/2023. Hapdeng kitei ki por na ka liang jong kane ka longkmie kala hap ban leit sah noh na kawei ka jaka sha kawei pat, bad da ka jingkhmih lynti ba kan sa don ka jingsngewthuh biang na liang ki bor pyniaid shnong.
Hynrei dei pynban ha ka 5/4/2024 ka Dorbar Shnong kala pynmih syndon ia ka hukum ba la weng shnong pura ia katei ka longkmie bad ia ar ngut ki khun jong ka kiba kynthup ia u Biktor Dhar bad Balen Dhar.
Halor kane ka jingjia na ka liang jong kiba haïing kim banse ban leit buh noh da ka ejahar ha Jowai Police Station ha ka 13/4/2024, khnang ban lait na kino kino ki jingjia ba sngewsih ia katei ka longing.