Ka Confederation of Meghalaya Social Organisation (COMASO) Jaintia Region mynta ka sngi ka 31.07.25 hapoh ka jingialam u Samla Sambormi Lyngdoh ba dei ruh u Vice Chairman ka COMSO Jaintia region, ka la leit ban ia kynduh ia u Deputy Commissioner ka East Jaintia Hills District U Shri. Sivansh Avasthi IAS, na ka bynta ban leit buh ia ka dorkhas jong ka COMSO Jaintia region ba la soi da u samla Sambormi Lyngdoh Vice Chairman bad u Roitre Dkhar Secretary COMSO Jaintia region na ka bynta ban dawa na ka office u DC ban khynra ia ki briew kiba nabar kiba wan buhai shnong hapoh ka thaiñ East Jaintia Hills da kaba ia trei lang bad ka COMSO Jaintia region khnang ban khanglad ia ki briew kiba nabar ban wan buhai shnong beaiñ shapoh ka thaiñ khamtam ia ki nong Bangladesh.
Khamtam ba ha kine ki sngi ba ka jylla Assam ka dang pynlong ia ka Eviction drive bad beh ia ki bym dei ki nong India ban leit phai sha ki jaka ba ki wan bad ka jylla Assam kam shah shuh ia ki bym dei ki nong India ban shong ban sah hapoh ka jylla Assam. Kumta kito ki briew kiba ka jylla Assam ka la beh ki lah ban pynlong jaka rieh tngen shapoh ka thaiñ East Jaintia.
Kum ban shu pynkynmaw ba dang ha kine ki sngi ba la dep ka Union Ministry of Home Affairs ka la dep phah ia baroh ki jylla ban thaw da ka Special Task Forces (STFs) na ka bynta ban peitngor ia ki briew kiba nabar ka India ki ba thmu ban rung beaiñ shapoh India, hynrei ha ba ia kren bad u DC ka East Jaintia Hills u la iathuh ba na ka liang jong ka jylla kam pat phah ban thaw ia kata ka STFs hapoh ka District kat kum ba long mynta.
Hynrei na ka liang jong u DC EJH u la ong ba u long u ba kloi ban iatrei lang na ka bynta ka jingbha jong ka District khamtam ban khanglad ia ki bar ri ban rung beaiñ shapoh ka District. U la ong shuh shuh ba un sa khot meeting ia ki Waheh Chnong kiba don hapoh ka thaiñ East Jaintia bad ruh ia ki sahep sorkar ban wad lad kumno ban khanglad ia ki briew kiba nabar ban rung beaiñ shapoh ka District bad ban wad lad ruh ban pynlong ka jingkhynra ha ki katto katne ki shnong kiba ki bar ri ki lah ban rieh tngen da kaba ia trei lang bad ki Waheh Chnong jong ka thaiñ.
