Ka KSU Laban Circle ha ka kylla step jong ka 10 tarik u bnai Nailar 2015 ha ka por 1 baje mynstep ka la ïoh bat ïa 2 ngut ki briew kiba dei ki khar muslim na Oxford Hills kaba hap hapoh ka Dorbar Shnong Kenches Trace Oxford Rilbong.
Hadien ka jingtohkit ïa ki kot ki sla la lap ba kine ki briew kim shym la don kino kino ki kot ki sla ban pynithuh ialade bad la wan ïalam ïa ki ban trei bylla ha kawei ka iing kaba don ha Oxford. Ynda la khynra ïa kata ka ïing la lap sa 4 ngut ki khar muslim ki bym don kot don sla. La ïathuh ba kine ki briew ki la ïoh ban rung sha Meghalaya da kaba ki wan da ki kali tourist bad pynithuh ïalade ba ki dei ki nong wan jngoh kai pyrthei bad ha ka jingtohkit ka Seng ka la lap ba ki dei ki poi ei kiba wad jaka rieh shane ha ka kam bylla bad ki la ïoh ïa ka jingiarap lyngba uwei u briew uba kyrteng Shajahan Ali uba dei na Assam bad ba sah ha Laban uba la pynbiang jaka trei ia kine ki briew.
Ïa kitei ki 6 ngut la aiti noh sha ki pulit ka Rilbong Beat House ha kajuh ka kylla step ban leh ia kaba donkam.
Ka Seng ha ka step 11 tarik Nailar, ka la leit kyndang sa ïa ka iingsah jong une u Shajahan Ali bad beh krad syndon ïa u.
Une u briew u kam ïalade ba u dei u kontraktor bad uba ju mlien ban wanrah ïa kine ki briew nabar jylla kiba lah ruh ban dei ki nong Bangladesh.
Ka Seng ka la maham ïa u trai ïing uba ai wai ia une u briew ba um bit ban ai ïing wai sha ki briew kiba wan nabar jylla khamtam ia ki khar muslim namar ba ka sorkar Assam ka dang kyndang ïa ki khar muslim kiba rung beaiñ bad namar ka jinglong jingman ha Bangladesh.
Ka Seng ka lah lap ruh ba bun na kine ki khar muslim ba sah ha Laban ki ju iarap para muslim ban ai jaka sah, khlem pyntip sha ki bor shnong.
Halor kane ka Seng ka la iakren ruh bad ki bor Shnong bad na ka liang ka Dorbar Shnong Laban mynta ki dang pynlong ia ka survey ban tip ïa ki khar muslim ba shong ba sah ha Laban.
Ka Seng ka la maham tyngeh ïa ki nong shong shnong ka thaiñ Laban baroh kawei ba kim bit ban pynshong pynsah bad pynbuhai shnong ia ki para muslim ba wan na bar jylla ha Laban bad ki trai ïing ki dei ban shimkhia halor kane ka bynta.
