Kum ka dak jong ka jingrakhe ïaka Gandhi Jayanti bad ka jingpynkut ïa ka prokram Swachhata Hi-Seva Campaign, mynta ka sngi Palei ka tnad Jowai Municipal Board ha ryngkat ka jingïasnohkti lang ka Jowai Traders Association (JTA), ka Dorbar Shnong Tympang Iawmusiang bad ki Committee ïew jong ka Seiñraij Jowai, CNI bad Iawshyiap kila pynlong da ka jingpynkhuid ïa ki bynta ka Iawmusiang.
Hashwa kane la pynlong ïa ka jingïalang ba lyngkot ha kaba ka kong D. V Lyngdoh, MCS, kaba dei ruh CEO ka Jowai Municipal Board ha ka jingkren kala pynsngew ïa ka jingdonkam jong ka jingkhuid jingsuba, da kaba kyntu ïa baroh ban pynlong ïa ki jaka ïew bad ki shnong ki thaw kiba khuid.
Ha ka juh ka por ka kyntu ïa ki Committee jong kitei ki ïew ba kin pynthikna ba ki nongdie madan bad ki nongshong dukan kim dei ban bret pathar ïa ki jaboh, hynrei ki dei ban pyllang shi jaka khnang ban pynsuk ïa ki kali jong ka tnad Municipal ba kit.
U ma Puramon Kynjing, Dalloi ka Elaka Jowai ula kyntu ban pynneh pynsah ïa ka jingkhuid jingsuba dei ban shim nyngkong ïa ka jingkitkhlieh halade kum u nongshong shnong. U la kyrpad ïa ki samla pule ba kim dei ban bret pathar ïa plastic jingbam sha ki bynta ka surok, da kaba pynshlur shuh shuh ban long ka nuksa kaba bha ïa ka imlang sahlang.
Ïa kane ka jingïalang la pynïaid da u ma P. Lyngdoh, u Chairman ka Jowai Municipal Board, ha ka jingdonlang ki nongïalam Shnong, ki dkhot Committee ïew, ki nongshong ïew bad kiwei de. Hadien kane ka jingïalang la shim bynta ha ka jingpynkhuid ïa ka Iawmusiang naduh, ki nala, ki kynroh bad ki sawdong sawkun jong ki dukan.
