Ka Loomkyrwiang Dorbar Shnong, Jowai mynta ka sngi 3 tarik u Risaw kala pynkup burom ïa u myntri ka sorkar jylla ma Sanbor Shullai uba dei peit ïa ka tnad Animal Husbandry, Veterinary, Art & Culture bad kiwei haka jingïalang bala pynlong ha Dorbar Hall jong ka shnong.
Ïa ka jingïalang la pynïaid da u symbud Waheh Shnong ma Daioolang Pakma, la ïoh ruh ka jingnguhblai na u Sophilos Lywait bad kumjuh ka jingkren na u ma Lammat-oo Laloo uba la pynpaw ka jingsngewkmen ba u khun jong ka shnong ula ïoh ba bat ïa kane ka kyrdan myntri, ula pynkynmaw ruh ïa ki kam kiba ka shnong kala dep ban ïaid lynti lyngba ka jingïarap jong u ma Sanbor Shullai, da kaba kitbok ba un dang ai ka jingshakri kaba bha tam ha ki sngi ban wan.
U ma Sanbor Shullai ha ka jingkren ula ai ka jingïaroh ïa ka shnong Loomkyrwiang kaba la shim ïa kane ka bynta ban pynkup burom ïa u, kum u myntri ula kular ban ïarap katba kot ka bor ban pynïoh ïa kaei kaba la thoh ha ka memorandum bala aiti ha u da u Waheh Shnong, kum ka jingpynbha ïa ka Sound System jong ka Dorbar Hall kaba la kot sha ka 38 lak katkum ka Details Project Report (DPR).
Shuh shuh ula ong kum u myntri sorkar ha ka jingtreikam un pynduna ïa ka ktien bad un pynbun da ka kam ym kumba long kiwei kiba heh tang ka ktien sha ki jaka paidbah.
Ula ong kum u myntri na kawei pat ka Constituency kam long kaba suk ïa u ban pynïoh jingïarap katkum ka jingdawa, hynrei un pyrshang ban ïakren ïa kane bad u MLA ka Jowai Constituency da kaba phah ïa kane ka jingdawa sha ka tnad sorkar ba kan ïoh leh ïa kaba donkam.
Ha kane ka sngi kum ka dak jong ka jingleh burom la pynphong ha u Myntri da ka Jaiñspong bad ka jingaiti ïa ka memento kum ka dak ban sah jingkynmaw, haba pynkut u myntri ula plie kumjuh ïa ka Fete jong ka shnong bad la kitbok ba ka shnong kan ïoh nong na kane ka Fete. Katba ïa ki kyntien ai khublei la ïoh na u Tremiki Lywait.
