Halor ka jingkren u Myntri thymmai ka sorkar jylla u Bah Sosthenes Sohtun halor ka rel kit marbam na ka liang u President ka HITO u bah Donbok Dhar haba kren bad ki nongthoh khubor u la ong ba ka seng ka pyrshah jur bad u la ong ba ka jingkren ban wanrah ia ka rel kit marbam ka long tang ban shu pyni ba kren kum u Myntri hynrei ka paw shai ba ym don ia ka jingkitkhlieh ia ka ri bad ka jaitbynriew namar u la klet ialade mynshwa ba u dei u nongialam sengbhalang.
Nalor kata u la ong ba u kwah pynshai sha ki paidbah ba bun ki paidbah ki iakren ia ka lynti rel namar da la wan ka lynti rel kan tad ka marbam.
U la ong ba u myntri kum u nongialam sengbhalang mynshwa u la dei ban kren shwa ia ka ILP, ynda ioh ia ka ILP lada ka wan ka rel haduh Sor ruh ki paidbah kin kyrshan, khlem ki lad jingiada kan buh jingma bad sa kawei kum u MLA bad kum u Myntri u jong ka thaiñ Ri bhoi u la dei ban pynleit jingmut shwa ban iakren shwa ia ka bording, namar katno ka jingshah ktah ki paidbah ha ka thaiñ Ri bhoi, kren shwa ia ka jingeh jong ki paidbah yn sa iakren ia ka lynti rel hadien ba la ioh ia ka ILP.
