Ka tnad Agriculture and Farmers Welfare jong ka sorkar Meghalaya, ha ryngkat ka jingkyrshan jong ka Meghalaya Farmers’ (Empowerment) Commission kila pynlong ia ka ïew ba shisien shibnai jong ki nongrep kaba la tip kum ka ‘Monthly Farmers’ Market’ ha ka 21.03.2026 ha Parking lot jong ka ophis Directorate of Fisheries mar pyrshah ka St. Edmund’s College, Shillong.
Ka jingthmu jong kane ka ïew ka long ban burom ia ki nongrep bad ia ki mar ba bha kiba ki wanrah, ha ka juh ka por ban ailad ia ki nongrep ban kin ioh ia ka lad ban die da lade hi ia ki mar jong ki sha ki nongpyndonkam. Ha kane ka sngi la sakhi ia kiba bun ki nongthied kila wan poi sha kane ka jaka.
Ki nongrep kiba la poi ban die ia ki mar jong ki sha kane ka ïew ki kynthup kiba na West Khasi Hills, na East Jaintia Hills, West Jaintia Hills, South West Khasi Hills, Ri Bhoi bad na East Khasi Hills.
Ha kane ka ïew la wan rah ia ki jait mar bapher bapher kum ki jhur ba dang bha (Fresh), ki dohkha, u shynrai, ki pylleng, ki wine ba shna hi (Local wine) nalor kiwei kiwei de ki mar rep, kane ka la khring bha ia ki nongthied napoh ka nongbah bad na ki shnong ba marjan ruh.
