Kyntu ïaka sorkar ba kan peit lem ïa ka jingeh ki nongri trai jylla
Ka Hill’s Farmer Union (HFU), West Jaiñtia Hills District mynta ka sngi saitjaiñ 21 tarik u Lber kala pynlong ïaka jingïakynduh lang, ban ïamir jingmut halor ki jingeh ba ki nongri jingri, khamtam kiba ri Sniang ki ïakynduh ha kine ki sngi.
Ïa kane ka jingïalang la pynlong ha ïing Dorbar Hall Lad- Mukhla, West Jaiñtia Hills, ha kaba ki nongri jingri na kylleng ka Jaiñtia Hills kiba la don 50 ngut eiei kiba wan sha kane ka jingïalang bad ban pynpaw ïa ki jingeh jong ki haka HFU khnang ban ïoh pynsngew sha ka Sorkar.
Kitei ki nongri sniang kiba ïoh ban ïamir jingmut halor ka jinghiar dor palat ka doh Sniang, nalor ka jingrem ki jingbam, ka khoit ka khiah ki sniang bad kiwei de.
U President ka HFU-WJHD ma Mutshwa Thabah haba ai jingkren ula ong hadien ka jingud jingnam jong ki nongri Sniang, kaba ktah nyngkong eh ka long ba ym don shuh kiba thied ïa ki Sniang (local) bad ka daw hi ka dei na ka jingïoh lad ki sniang nabar ka jylla ban wan shalan shapoh ka jylla bad kiba wanrah lang ha ryngkat ki jingpang jingshitom.
Ula pynsngew ïaka dor jong ka doh Sniang la ju die lang haka dor kaba 240-250/- tyngka shi kilo, hynrei la ïoh jingtip na ki nongkhaïi ba kim lah shuh ban thied ïa ki sniang (Local) namar kila ïoh lad ban thied haka dor kaba rit na ki sniang kiba wan nabar jylla kaba long tang 150-160/- tyngka sngi kilo.
Halor kane kum ka HFU kaba peit ïa ki nongrep kan sa leit ban ïakynduh sha ki bor ba halor, khamtam ïa u myntri ba dei peit ïa ka kam ri jingri, khnang ban teh lakam bad pynduh noh ïa ka jingwan rah ïa ki sniang nabar jylla.
Halor ka jingduna ki jaka sumar ha ki Center jong ki Block bapher bapher bad ka jingbym biang ki dawai dashim ïa ki jingri, la kyrpad ïa ka sorkar ba kan shimkhia ïa kane ka jingeh, ula ong na ka por sha ka por haba pang ba shitom ki jingri la ai jingtip mar mar sha ka tnad veterinary, hynrei katei ka tnad kala phah wanrah pynban ïa ki jingri sha ki ophis bad kane ka long pynban ka jingma kumba leit pynsaphriang ïa ki jingpang.
‘Ka jingkiew dor palat ka jingbam sniang ka dei ka jingeh kaba ktah nyngkong eh ïa ki nongri’ kumta la kyntu ïa ka sorkar ban ai Subsidy ïa ki nongri sniang kumba long ïa ki dawai sboh, khnang ba yn lah ban pyndap doh ïa ka jylla.
Kum ka seng jong ki nongrep ka kyrpad jur ïa ka sorkar ba kan ai jingïarap ïa ki nongri sniang, da kaba ong haba hiar ka dor sniang ‘kumno ngin lah ban siew ïaka ram ba ïoh na ka sorkar bad na kiwei de, ong utei u President.
Shuh shuh ula kyntu ïa ka sorkar ba kan ai jingïarap ïa ki nongri sniang haba shna ïa ki sem sniang lyngba ka skim shispah sngi, da kaba kdew baka jinglut haka kam ri sniang ka dei ka jingshna ïa ki sem sniang bad ki jingbam. Ula kyntu jur ïa skim Piggery Mission dei ban ai beit sha kito kiba la nang bad pyntbit bha ïa kane ka kam.
