Ki Nongshet ja skul hapoh jylla ba la tip kum ka Union of Cook Cum Helper Meghalaya Poshan ha ka 28 tarik Nailar 2026 ki la wan kynduh ia u MP ka Rajya Sabha u James PK Sangma ban kyrpad ban iakren ia u Narendra Modi bad kumjuh ia u Myntri ka tnad pule puthi ka Sorkar pdeng haba iadei bad ka jingkyntu ki nongshet ja skul ban kyntiew noh ia ka bhah kaba ki dei ban ioh na ka Sorkar pdeng.
Haba kren sha ki lad pathai khubor u Adviser ka kynhun Union of Cook Cum Helper Meghalaya u Bah Khroo L Pariat u la ong hadien ka jingkynduh bad u James PK Sangma MP ka Rajya Sabha u la pyntip ba un sa leit kynduh ia u Myntri ka tnad pule puthi ka Sorkar pdeng bad kumjuh sha ka Myntri ka tnad pla tyngka ban buddien ia kane ka jingpynsngew ki nongshet ja skul. Nalor kata u la ong ba ki nongshetja skul ki la pynsngew ruh ha u MP ka Rajya Sabha ba naduh ka 1 tarik Nailur 2026 ki nongshet ja skul hapoh ka jylla bad kumjuh sha ki thaiñ lam mihngi kin sangeh ban leit sha ki kamra shet ja ha skul namar ki lah thait, ia kajuh shi kajuh namar da ki phew snem ki la phah shithi sha ka Sorkar pdeng hynrei ki sngap mynthi ym dei ba pyrshah ia ka Sorkar jylla ne Sorkar pdeng hynrei ki nongshetja skul kin pynsngap da ka kam na ka bynta ban dawa kyntiew ia ka bhah na ka Sorkar pdeng.
Shuh shuh u la ong ba ki nongshet ja skul ki kyrmen ba ha kane ka kynti ba mynta kan urlong noh ka jingdawa namar u Myntri Rangbah ka jylla u la ia kren bad pynsngew ruh sha ka Sorkar pdeng haba iadei bad ka jingdawa ban kyntiew ia na bhah na ka Sorkar pdeng bad kum ki nongshetja skul ki kyrmen bad ngeit skhem ba kane ka kynti mynta kan urlong ka jingdawa jong ki kum ki nongshetja skul ban kyntiew ia ka bhah na ka Sorkar pdeng.
Ka jingiakhih kan iaid beit khnang ban pysngew sha ka pyrthei ba ki nongshet ja skul ki ioh tang 900 na ka bhah ka Sorkar pdeng khnang ba u Narendra Modi un pynsngap noh ia kane namar bunsien lada ym pyni da ka kam bunsien ka Sorkar ka shu shim kabu la ong u Bah Khroo L Pariat.
