Ki bor pynïaid District jong ka West Jaiñtia Hills kila pynlong ia ka prokram pynsngewthuh paidbah ha ka jingiadei bad ka Meghalaya Right to Public Service Act, 2020, mynta ka sngi ha District Library Mynthong, Jowai, khnang ba ki paidbah kin tip shaphang ki hok shakri paidbah. Ha kane ka prokram la wan ban ïashim bynta da ki nongtrei sorkar, ki nongmihkhmat na ki Dorbar Shnong, na ka Synjuk ki Waheh Chnong ka Ri Jaiñtia bad kiwei de.
Ïa kane ka prokram la pynïaid da u ma A.I. Mawrie uba dei u Research Officer ryngkat bad u ma Iaidbha Phawa uba dei u Assistant Research Officer, u ma Kynphammi Ryngkhlem, Research Assistant ka tnad Planning, DC Office, Jowai bad u ma Roibok Pohrmen, E-District Manager kum ki riewshemphang (Resource person) ba ai jingpynsngewthuh.
Na ka liang jong ki riewshemphang kila batai shaphang ka jingdonkam ban tip ïa ka Meghalaya Right to Public Service Act 2020, ban tip shaphang ki bynta bad ki jingtreikam jong kane ka aiñ, ka bynta jong u ophisar ba don bynta ha kane ka kam, ka jingtreikam jong ka Commission, ka jingbuh por bad ka jingtip ban wat ki lad jingiarap lada jia ba pynslem ne bym treh ban ai ïa ka jingshakri sha ki paidbah.
Kane ka jingai jinghikai ka kynthup ia ka jinghikai kyndon ba kyndon halor kumno ban buh ïa ki jingujor ba nyngkong hakhmat ka Appellate Authority bad ka jingujor ba ar hakhmat ka Commission ryngkat ki kot ki sla ba donkam katkum ki kyndon treikam.
Ka la don ruh ka jingpynsngewthuh sha ki nongwan sha kane ka prokram halor ka CM Connect bad ki jingtreikam jong ka da u Stopper Bang, uba dei u Project Coordinator ka CM Connect, Jowai Centre.
