Ka jingïalang kaba seisoh bha kala long mynta ka sngi ha Secretariat ba la lamkhmat da u Symbud Myntri Rangbah ka jylla u ma Sniawbhalang Dhar, halor ka mat ki Nongdie Madan ha Laitumkhrah.
Ha kane ka jingïalang la ïadonlang da ki nongkitkam ka Laitumkhrah Dorbar Shnong, ka Local MLA ka kong Ampareen Lyngdoh bad ki ophisar na ka tnat Urban Affairs. Ka jingïakren ka la long kaba shai bad kaba pynleit jingmut ha ki lad ki lynti ban pynbeit ïa ka jingeh ki Nongdie madan da ka rukom kaba ïahap bad kaba ai jingïada ïa baroh ki liang.
U ma Sniawbhalang Dhar u la pynpaw ba ka jingïalang ka long kaba seisoh shisha bad ka pyni ïa ka jingïatreilang kaba bha hapdeng ka sorkar bad ki bor shnong. U la ban jur ruh ba ka sorkar ka la shim ïa ki sienjam kiba donkam bad ka jingpynbeit ïa ka mat ki Nongdie madan ha Laitumkhrah kan sa urlong noh shen.
Ka MLA Kong Amparin Lyngdoh ruh ka la pynpaw ïa ka jingsngewkmen bad ka jingkyrmen ba lyngba kane ka jingïatreilang, yn lah ban wanrah ïa ka jingpynbeit kaba long-term bad kaba myntoi ïa baroh lang.
Ka jingïalang ka la kut ha ka jingkyrmen kaba skhem ba ïa ka jingeh ki Hawker ha Laitumkhrah yn sa lah ban pynbeit noh kloi bad kan wanrah ïa ka jingbeit jingkhuid bad ka jingpynïaid kaba biang ha katei ka thaiñ.