Ka 1st Shillong International Film Festival (SIFF) kaba lai sngi kaba la sdang naduh ka 25 tarik lber haduh 27 tarik Lber 2026 ba la pynlong da ka tnad Directorate & Information & Public Relation DIPR ka sorkar jylla ka la poi noh noh shah kaba kut bad ka long ruh ka kaba jop da ka jingiashim bynta shitrhem naduh ki samla pule, ki nongshna phlim bad ki riew ieid phlim kiba mihkhmat ia ki kolej bad ki skulbah bapher bapher ha kylleng ka jylla Meghalaya bad shabar.
Ka sngi ba khatduh jong kane ka tamasa kaba lai sngi ka la sdang da ka jinghikai ba stad halor ka jingthoh screenplay da u nongshna phlim u Dominic Sangma, uba la ïasam ïa ki jingshemphang kiba lah ban treikam ha ka rukom ïathuh khana ha ki phlim. Ka jingïalang ka la paw ba ka long kaba kordor na ka bynta ki samla pule bad ki nongshna phlim kiba kwah ban tei ïa ki kam ha ka kam shna phlim.
Ha kane ka prokram la pyni ruh ïa ki phlim bapher bapher kiba pynpaw ïa ki phang bapher bapher bad ki rukom thaw jingthaw. Ki phlim ba la pyni ki kynthup ïa ki phlim Ade da ka Theja Rio, Roots Renewed da u K. Mark Swer bad Tarun Bhartiya, By the Home da u Mankap Nokwoham, Maimizial da u Raymond Colney, Ahor da u Kenny Lyngdoh, Impermanent Resident da u Huu-Tuan Nguyen, bad Shape of Momo da u Tribeny Rai. La pyni ruh ia ki phlim ba jop na ka jingiakop shna phlim jong ki samla pule ka SIFF, kaba pynpaw ia ka sap kaba dang mih hapdeng ki nongshna phlim samla.
Kawei ka bynta kaba kongsan jong ka sngi pynkut ka long ka jingïakren lang halor ka “Streaming ïa ki khana, ka jingpynkylla ïa ki screen: ki OTT Platform bad ka lawei jong ka Cinema ha Meghalaya bad ka Northeast India.Ha kane ka sngi pynkut la don lang u myntri ka tnad Directorate Information & Public Relations u bah Lahkmen Rymbui, ha ryngkat u Director ka DIPR u bah B.S. Sohliya (IAS), ki heh ka tnad, ki nongshna phlim bad ki nongshah khot sngewbha.
Haba ai jingkren ha kane ka sngi u bah Rymbui u la ai ka jingiaroh ia ki nongiashim bynta, ki nongshna phlim bad ki samla pule na ka bynta ka jingshim bynta shitrhem jong ki ha baroh kawei ka tamasa. U la kdew ba ka jingtlot kaba paw hapdeng ki nongiashim bynta hadien lai sngi ka jingiatreilang kaba jur ka pyni ia ka jingaiti bad jingsngewtynnad jong ki ban shna phlim.
Haba batai ia kane ka tamasa kum ka sienjam kaba dei, u la ban jur ia ka jingdonkam ban thaw ia ki rynsan na ka bynta ki samla kiba don sap bad ban pynshlur ia ka jingiatreilang hapdeng ki jingmut jingpyrkhat kiba thymmai na ka jylla Meghalaya, ka thain shatei lammihngi bad ha kylleng ka ri. U la ong ba ka jingpynpaw bad jingtip ba la ioh ha kane ka tamasa kan don ka bynta kaba khraw ha kaba pynwan dur ia ki jingleit jingwan ba thymmai jong ki nongiashim bynta.
Haba ai khublei ia ki samla pule kiba la iashim bynta ha ka kam shna phlim bad kiba la ioh ruh ia ka khusnam ha ka jingiakop shna phlim,u myntri u la pynpaw ia ka jingdon kaba khlain jong ka sap bad ka jingstad hapdeng ki samla bad u la ong ba kum kine ki jingthmu ki long kiba donkam ban pynroi bad kyntiew ia ki sap jong ki. U la ai khublei ruh ïa ka jingkyrshan jong u Myntri Rangbah ka Jylla ba donburom ban pynlong ïa kane ka tamasa kaba jop bad kaba iaid beit iaid ryntih.
