Ka Joint Action Committee (JAC), kaba kynthup ïa ka East Jaiñtia Hills Truck Owners & Transporters Association (EJHTOTA) bad ka Jaiñtia Hills Truck Owners Association (JHTOA), ha ka 6 tarik Ïaïong, kala aiti ïa ka shithi sha ki Deputy Commissioner ka East bad West Jaiñtia Hills District ban pynbna ïa ka jingkhang (boycott) ïa ka jingïaid kamai ki Bulker Truck lyngba ka thaiñ Jaiñtia.
Ha ka jingïalang lang kaba la long ha ka 4 tarik Ïaïong, 2026, la rai paidbah ban khang lut ïa ka jingwan rung bad jingïaid ki Bulker Truck kiba kit ïa ki mar (kum ka cement bad clinker) ha ka thaiñ Jaiñtia Hills baroh kawei, khamtam na ka thaiñ Lumshnong.
U President ka EJHTO&TA, u ma Kyrshan Dkhar, ula ong ba, “Ka jingpyndonkam ïa kine ki kali kiba heh bha kala ktah jur ïa ka jingïoh jingïarap jong ki trai truck bad ki nongñiah kali shnong. Da kaba kit ïa ki mar ha ka bulk khlem da don ka standard packaging, ki company cement ki lait na ka rukom quota kaba ju kyrshan ïa ki nongkit shnong.
Ka JAC kala dep ban ai jingtip paidbah (notice) sha ka Jaiñtia Hills Cement Manufacturers Association (JHCMA) naduh ka 15 tarik Nohprah, 2025, ban kyntu ïa ki ba kin sangeh ban pyndonkam ïa kine ki kali. Hynrei, ïa kine ki jingkyrpad la leh bym suidniew bad ka jingïaid ki bulker ka dang bteng haduh mynta.
Namar kata, “ngi pyntip paidbah sha ophis jong phi ba kane ka jingkhang kan treikam naduh ka 4 tarik Ïaïong, 2026, ban pynthikna ba kine ki kali kim dei shuh ban ïaid. Sngewbha ban tip ruh ba lada mih kano kano ka jingjia kaba sngewsih ne ka jingeh na ka jingïaleh pyrshah jong ki company ïa kane ka boycott, ka JAC kam shim jingkitkhlieh halor kata.
Ka JAC kala kyrpad ïa ophis u DC ban kyrshan ïa ki ha kane ka kam khnang ban ïada ïa ka kamai kajih, ka ïoh ka kot bad ka jingiaid beit iaid ryntih ka kam.”
