Ha ki 12 snem bad haduh mynta ba la knieh jubor ia ka hok longtrai kiba bun ki Nongshong shnong jong ka East Jaintia Hills District kiba don la ki par Dewiong. Ka jingkhang tih dewiong ha kine ki 12 snem bad haduh mynta ka la ktah ia ka ioh ka kot ki trai pardewiong bad ki Nongshong shnong jong ka District ong u Ma Marshal SB Biam haba kren ha u Yutip hynne ka sngi (05/06/2026) ha ka jaka shah thngan jong u ha Ladrymbai Dongwah, East Jaintia Hills District.
Shuh shuh u Ma Marshal S.B. Biam haba kren ha U Yutip u ong ba naduh ba khang tihdewiong bun ki long iing ki longsem jong ka East Jaintia Hills District ki duh ei ialaka jingim khlem dei por naba kim don Peisa-Tyngka ban iohlad ban leit shah sumar sha ki Hospital ba kin ioh biang ia ka jingkoit jingkhiah. Nangta u ong ha ka por ba danglah ban tihdewiong, kiba bun ki khun Samla jong ka District ki la iaid shakhmat ha ka pule ka puthi bad naduh ba ka Sorkar ka khang tihdewiong,kiba bun ki khun Samla ki kynrandien noh bad hap sangeh na ki jingpule jong ki naba ki Kmie ki Kpa kim donlad shuh ban kyrshan ba ki khun kin pyndep ia ki jingpule jong ki.
U Ma Marshal S.B.Biam President bad ki Dkhot jong ka JCOMSWA kiba la iohi ia kane ka jingsohsat jong ki Nongshong shnong, ka East Jaintia Hills District bad ki la thoh bad kyrpad ia ka Sorkar ba kan pynlaitnoh ia ka jingkhang tihdewiong, phewse la ong ba na ka liang ka Sorkar ka la leh kyllut bad leh bym iohsngew ia kane ka jingdawa jong ka Seng na ka bynta ki Nongshong shnong kiba im da kaba ki tih bad die dewiong bad kane ka jinglehkyllut jong ka Sorkar ka pynlong ia u President jong ka Seng ban raikut ban shah thngan haduh ban da iap lada donkam
Ki kynhun Seng bhalang kiba la wan ban ai jingkyrshan ia kane ka jingshah thngan u Ma Marshal S.B.Biam ,kynthup ia ka Seng JYF,JHC,JSM,RTI,HYDC,NPT,EJYM,HNYE,HSYF,nalor ki Sengmanbei,Barwai,Moolamanoh,Wapung skur, Wapung shnong,Pynurkba, Tourist Taxi Assaciation, Senglongkmie Saphai,JJU,na ka VPP Youths Wing bad na kiba bun ki Waheh shnong jong ka East Jaintia Hills District bad ka Sein Manbei Lad Wapung.
Na ka liang ki Doktor kiba dei peit ia ka jingkoit jingkhiah u Nongshah thngan wat lada u Nongshah thngan um shah, hynrei pat la ong ba na ka liang jong ki kim ju pep ban jngoh ia u arsien shisngi katba na ka liang ki Nongmihkhmat MLA lane MDC ym pat don u ne ka kiba wan jngoh ia u Nongshah thngan.
Haduh ba pynmih ia kane ka Khubor u Ma Marshal S.B.Biam u la shah thngan 106 kynta bad haba shim na ka SUR U PAIDBAH la ong.”Lada jia ba iap une u briew ( Marshal SB Biam, kaei ka jubab na ka Sorkar,na ki MLA bad MDC ka thain”.
