Ka East Jaintia Hills Truck Owners Transport Association (EJHTOTA) bad ka Jaintia Hills Truck Owners Association (JHTOA) ha Jaintia Hills District ki la sdang ïa ka jingïakhih (strike) hynne ka sngi jong ka 14.04.2026, kaba khlem buh por pyrshah ïa ki Bulker trok. Kine ki ar tylli ki seng ki la thaw ruh da ka Joint Action Committee (JAC), na ka bynta ban pyrshah ia kitei ki trok kit mar kit mata na ki cement plant kiba la pynduh ia ka hok jong ki trai jylla.
Ha ka jingiadei bad kane ka JAC ka la aiti ïa ka shithi sha u Deputy Commissioner ka East Jaintia Hills District, u Manish Kumar IAS, ha ka 11 tarik Ïaïong. Ka mat ka long: “Ka jingpyntip shaphang ka jingïai bteng ïa ka jingïakhih pyrshah ïa ki trok Bulker.”
Kum ban pynkynmaw ba ka JHTOA ka don palat 300 ngut ki dkhot kiba dang trei bad ki don palat 400 tylli ki trok, katba ka EJHTOTA ka don palat 300 ngut ki dkhot bad palat 300 tylli ki trok.
Ka jingïakhih kaba khlem buh por pyrshah ïa ki trok Bulker ka long ha Tuberkmai Shnong bad Tahkhniang ha u National Highway-6 ha East Jaintia Hills District. Ki volunteer, ki trai trok, ki driver bad ki dkhot ki la don ha katei ka jaka mynta ka sngi ha kaba bun na ki trok bulker la ioh ban pynphai biang sha ki jaka kit mar (loading point) da ki dkhot ka JAC.
Haba kren sha ki lad pathai khubor, u President ka JHTOA u Biangshwa Shylla u la ong ba ki la dep ban aiti ïa ki shithi sha ki cement plant bad ruh sha ki bor pynïaid District, hynrei haduh mynta, kitei ki karkhana pynmih dewbilat kim pat ai jubab. Mynta ka sngi, ka JAC ka la rai ban pynsangeh ïa ki trok bulker bad pynphai biang ïa ki sha ki jaka kit mar jong ki. Ki dkhot jong ka JAC ki pynpaw ba kine ki trok ki ktah ia ka kamai kajih ki trai trok jong ki trai ri. Don kumba 200–300 tylli kine ki trok kiba ïaid ha ka District, kaba la pynhiar ïa ka lad kamai jong ki ar seng. Mynshwa ki ju ïoh kit haduh 80 tylli ki trok ha ka shi sngi ha ka cement plant ha East Jaintia.
Ha kawei pat ka liang, u President ka EJHTOTA u Kyrshan Dkhar u la ong ba ka jingïakhih ka dei ruh namar ba ki company cement kim shym la theh shuh ïa u dewbilat ha ki song (sacks) hynrei ki theh beit ha kitei ki trok bulker. Ki seng ki sheptieng ba kin duh noh ïa ka bynta (quota) jong ki ha ka jingkit mar na ki company cement. Ka JAC ka la phah shithi sha ka company ban dawa ba kin pynsangeh ïa ka jingpyndonkam ïa ki trok bulker. Ym pat don ka jingtip kaba bniah shaphang ki trai jong kine ki trok, hynrei ki lah ban dei ki benami.
Kine ki trok ki la treikam la palat shi snem, ha kaba sdang ki don tang 3–4 tylli ha ka shi sngi, hynrei mynta ki la bun bha bad ki dei kiba dang thymmai. Bun na ki la ñiah da ki trai shnong. Ki seng ki la shah katto katne tylli ki trok bulker mynshwa, hynrei mynta kim treh shuh ban pdiang namar ka jingbun jong ki.
