Ia ka World Art Day 2026 lane ka Rakhe Sngi Mattithaw Satlak Pyrthei la rakhe mynta ka sngi ha ïing u Lat ka Jylla Meghlaya ban sahnam ia ka lyngkhuh sngikha jong u barikor bakhraw tam ha pyrthei u Leonardo da Vinci, ka 15 tarik Ïaiong, 2026. La rakhe ruh ia ka jingrwai shitrhem jong ka Ri India ba ju tip kum ka Vande Mataram ka ban dap shispah sanphew snem mynta ka snem 2026.
U kongsan ha kane ka rong ka taw u Bah Charles Pyngrope, Lamphang barim jong ka ïing Dorbar Thawaiñ ka jylla Meghalaya u la kren pynkhie rasong ia ka thohdur ha jylla da ka ba u la nam ia ka nongbah Shillong bad ka jylla Meghalaya kum ka dur ba miatdur tam ha pyrthei ba lah ban sien syntiew ia ka thohdur ba paka bad pura. Kiwei kiwei ki kynrem lyndan ki ba kren ha kane ka sngi rakhe Mattithaw Satlak Pyrthei ki long u Bah F. R. Kharkongor, Principal Secretary to the Government of Meghalaya, Arts and Culture Department; Shri Manaj Saha, President of the International Association of Art – India; Shri Biplap Roy, Brand Ambassador of the Association; Shri R. V. Warjri, IFS, Adviser to the Meghalaya Chapter; and Bah Raphael Warjri, State Coordinator of the Meghalaya Chapter, ryngkat ruh kiwei kiwei ki kynrem lyndan bad ki barikor jong ka jylla.
Hadien ka jingrakhe la plie ia ka shlem pyninam ia ki dur thoh jong ki sawphew ngut ki barikor na jylla bad na kylleng ka Ri India da u kongsan Bah Charles Pyngrope ha ka jingiadonlang jong baroh ki kynrem lyndan bad ki barikor ka jylla. Ka jingkren ba kongsan ka long na u khliehduh jong ka International Association of Art – India, u Bah Manaj Saha u ba la kdew ia kiei kiei ki jingdonkam jong ki barikor katkum ka jingtbit jong ki na ka bynta ban kyntiew ia ka thohdur bad mattithaw ha jylla bad ha ka thaiñ Shatei Lammihngi ka Ri India. U la ban jur ba dei ban pynkhreh noh shaid shaid na ka bynta ban seng ia ka shlem hikai thohdur bad ki shlem pyninam na ka bynta ba ki barikor na jylla ba kin lah ban kiew irat bad ka pyrthei baroh kawei.
Ha ba kren shaphang ka nongbah Shillong ka ba la rasong ha baroh ki liang bad ka ba la rim tam na ki nongbah naduh ba dang synshar ki phareng haduh bad da ioh laitluid ka Ri India. Hynrei u la bynñiaw pat ba wat tan kawei ruh ka shlem hikai thohdur ym pat lah ban seng ha jylla bad kumjuh ia ki shlem pyninam na ka bynta ban kyntiew ia ki barikor batbit na jylla. U Bah Raphael Warjri u la kam ba ki jingpyrshang na ka por sha ka por ki la iaid lyngba ki byllai ki diengpyngkiang ba khlem lah ban pynurlong haduh mynta. Kumta u la kyrmen ba lyngba ka International Association of Art – India ka don ka jingkyrmen ban wanrah ki jingkylla ha jylla ha ki por ki ban wan.
Kum shibynta jong ka jingrakhe Sngi Mattithaw Satlak Pyrthei la pynlong ruh ia ka jingkren na ki akhia ha ka mattithaw bad Thohdur ba kynthup ia ka Dr. Meghali Goswami, Assistant Professor at Kala Bhavana, Visva-Bharati University, u Shovin Bhattacharjee, Dr. Prakash Kishore bad Arak M. Sangma ki ba la kren ban sam jingtip ia la ka jingtbit ha la ki kam thohdur bad ki jingtip shaphang ka thohdur bad mattithaw ha jylla, ryngkat bad ka jingshim bynta jong ki barikor ban ia syllok bad pashat ia ki jingtip ha ki ba bun ki bynta na ka bynta ban kiew rasong ka thohdur ha jylla bad ha ka Ri India baroh kawei. La rwai myllung ia ka jingrwai iaroh ia ka meirilung meirisan kum ka kmie jong ka Ri India ba tip kum ka Vande Mataram da ki kaitor hapoh ka jingialam jong i Kong Silbi Passah ka ba la pynkhieim ia ka mynsiem ban ieit shitrhem ia ia ka Meirilung Meirisan ha Ri India baroh kawei.
