Ki bor pyniaid Sub-Division jong ka Pynursla Civil Sub-Division, lyngba i Additional Deputy Commissioner la pyntip ba na ka daw jong ka jingbteng jong ka jingtwa ki maw ha ki bynta jong u surok naduh Laitlyngkot haduh Mawlieh (Ch 22+00 to Ch 35+00 Kms) ha u surok Shillong-Dawki bad khnang ban iada na kino kino ki jingjia ba sngewsih la hap ban khang shwa shipor ia ka jingiaid jong ki kali ha kitei ki bynta.
Ia kane ka jingkhang iaid ia ki kali la sdang naduh hynnin ka miet bad ka dang bteng haduh mynta ka 21 tarik Iaiong, tad haduh ba ki bor ba dei peit kin pynbna da kawei pat ka hukum. La khang ia ka jingiaid jong ki kali ka long shi bynta ban iada ia ki nongleit nongwan, hadien ba jia ka jingshahban maw jong ka wei ka kali Mahindra Pickup hajan ka shnong Mawlieh kaba la wanrah ia ka jingduhei ki ar tylli ki mynsiem briew.
La pyntip ba na ka liang ki bor Pulit, ka NHIDCL kaba dei ka Company ba pyntrei ia kane ka surokbah NH260 lem bad u Contractor bad ka tnad PWD (Roads) ki dang pynlong ia ka jingtrei miet bad sngi ban ioh pyllait ia kane ka jingtwa khyndew bad maw.
La kyntu ia ki paidbah ban iatreilang bad ki bor pyniaid bad lada don kiba pyrshah yn pynshitom ia ki katkum ki kyndon aiñ.