Ka Jaintia Students’ Movement (JSM), Central Body, mynta ka sngi 21.04.2026, kala phah daka jingthoh sha u Chief Minister Government jong ka jylla Meghalaya u Conrad Sangma, ban pynsngew sha ka sorkar, halor ka jingeh kaba ki samla pule na jylla Meghalaya ki iakynduh jingeh ha kaba iadei bad ki eksam bala pyniaid da ka Staff Selection Commission (SSC).
La ioh jingtip ba kumba ju long ha ki snem ba la dep, la ju pynbiang ia ki jaka thoh eksam hapoh ka jylla Meghalaya, khamtam ha Shillong. Hynrei ha une u snem, bun na ki samla na Meghalaya la ai jaka thoh eksam shabar jylla, kum ha Jorhat, Assam.
Shuh shuh, ka tarik jong ka eksam kaba ju long ha u bnai February, mynta la pynslem bad la buh ban long ha ka taiew ba khatduh jong u bnai April bad u bnai May 2026. Kane ka jingpynkylla bad ka jingpynbiang jaka shabar jylla ka la wanrah ka jingeh kaba khraw ia ki samla, khamtam na ka thaiñ Jaintia Hills.
Kane ka jingleh kumne ka wanrah iaka jinglut jingsep kaba khraw na ka bynta ka leit ka wan, ka jaka sah bad ka bam ka dih, ka wanrah iaka jingktah iaki samla ki ban thoh ia kane ka exam. Nalor kata, ka jingjngai ka jingleit bad ka por kaba lyngkot ban pynkhreh namar ka jingslem ka eksam ka la pynmih shuh shuh ia ka jingkhuslai bad lah ban ktah ia ka jingtreikam jong ki ha kane ka eksam kaba kongsan. Namar ka eksam kan sdang naduh 27 tarik April 2026, ki samla kim don por shuh ban pynkhreh bha ia ki jingdonkam jong ki.
Halor kine baroh, ka JSM Central Body ka kyrpad jur ia ka sorkar Meghalaya ban shimkhia ia kane ka kam bad ban kren sha ki bor ba dei peit ban pynurlong ia kine ki jingdonkam.
Ban pynbiang ia ki jaka thoh eksam SSC hapoh ka jylla Meghalaya, khamtam ha Shillong ne kiwei pat ki jaka kiba biang. Ban pynkylla biang (re-allotment) ia ki jaka thoh eksam jong ki samla kiba la bynta sha ki jaka kiba jngai shabar jylla. Ban pynthikna ia ka jingpynbeit por kaba biang ha ki snem ban wan khnang ban lait na kum kine ki jingeh.
Ka Jaintia Students’ Movement kan iai buddien ban iada ia ka bha ka miat bad ka jingmyntoi jong ki samla pule ha ka jylla. “Ngi kyrmen skhem ba ka Sorkar kan shimkhia kyrkieh ia kane ka mat bad ban leh ia kaba donkam ban iarap ia ki samla. Ia kane ka khubor la phah da u President Jaintia Students’ Movement (JSM) Central Body, u Leningstar Rymbai.