U Sub-Divisional Magistrate jong ka Pynursla Civil Sub-Division, Pynursla u bah Gautam Warjri, MCS, ula pynkynmaw bad bthah biang ia baroh ki nongniah kali heh kiba iaid lyngba ia ka jingkieng Dawki ba kim dei ban kit ia ka jingkhia kaba palat 9 MT (Metric Tonnes) namar ba ka lah ban ktah ia ka jinglong jingman jong katei ka jingkieng.
Ia kane ka hukum la hap ban pynjari biang ka long hadien ba u SDO (C) ula ioh jingujor lyngba u Asst. Executive Engineer, P.W.D (Roads), Pynursla Sub-Division No.II ba ki don ki kali heh (trucks) kiba kit ia ki mawshun bad kiwei de ki mar kiba khiah palat ia ka 9 MT ba ki iaid lyngba ia ka jingkieng Dawki kaba don halor ka wah Umngot.
Kumta la pyntreikam biang ia ka kyndon kaba la dep ban pynjari naduh kine ki por ba la dep hapoh ka Section 163 jong ka Bhartiya Nagarik Suraksha Sanhita (BNSS), kaba la khang pyrshah ia ka jingkit palat pud kaba tam ia ka 9 MT.
Lada lap ia kino kino kiba ialeh pyrshah kin shah pynshitom katkum ki kyndon aiñ pynkut ka khubor.