Ka Joint Action Committee, kaba kynthup ia ka East Jaintia Hills Truck Owner and Transporter Association bad ka Jaintia Hills Truck Owners’ Association, ka la bteng bad nang pynjur shuh shuh ia ka jingiakhih ba khlem buh por jong ka ban bat bad pynphai noh ia ki bulker truck jong baroh ki company cement, ka East Jaintia Hills bad ruh ia kiwei pat ki truck, nalor ki bulker, kiba dei jong ka Star Cement bad Dalmia Cement.
Kumban shu pynkynmaw, ka JAC ka la sdang ia katei ka jingiakhih da ka ba bat bad pynphai noh shwa tang ia ki bulker truck kit cement jong kitei ki kompany naduh ka 14 tarik mynta u bnai ha Tuber Tahkhniang, East Jaintia Hills. Hynrei, naduh ka 24 tarik pat, mynta hi u bnai, ka la nang pynjur shuh shuh ia ka jingiakhih, da kaba bat bad pynphai noh sa ia kiwei ruh de ki trok kit cement bad clinker jong ka Star Cement bad Dalmia Cement.
Ka daw ba la pynlong ia ka JAC ban shim da kane ka sien jam, ka long halor ki artylli ki nongrim. Kaba nyngkong ka long, ka jingdawa na kitei ki company cement ban pynduh pyndam noh shisyndon ia kitei ki bulker truck, namar ka jingpyndonkam ia kitei ki jait truck ban kit bad leit buh cement sha kylleng ki jaka ha Ri Khasi-Jaiñtia bad ha ka jylla hi baroh kawei, ka la ktah shi katdei eh ia ka ioh kam ioh jam jong ki trai trok trai ri trai trai muluk ha kitei ki company.
Kaba ar pat ka long, ka jingdawa ban burom bad pyntreikam hok ia kaei kaba la iapynbeit bad ka Star Cement lem bad ka Dalmia Cement, ba dei ban ai trip mar 9 trip ha ka shisngi ia kawei kawei ka seng bad kumta ter-ter. Hynrei, kat kum ba long mynta, kitei ki company, ki la ai trip tang 3 haduh 6 trok ia kawei-kawei ka seng, nalor sa ka jingpyn-ap slem ia ki truck jin 4 haduh 9 sngi ha ka jaka thep bad pynhap mar. Kane, ka la nang ktah shuh shuh ia ka jingioh trip jong ki trai truck trai ri trai muluk. Da kane ka buit sianti jong kitei ki company, ka JAC ka la duh noh jin mar shiteng na ka bhah jingioh trip jong ka ha kitei ki company.
“Da katei ka jingleh khliehshrieh jong ki company cement, kawei ka truck kan ioh trip tang 2-3 trip ha ka shibnai. Tang da kane ka jingioh hato, ngin siew ram sha bank, ne ngin siew tulop driver, ne ngin thied khaw, ne ngin phah skul khun, etc.?” ong ka JAC.
“Ha ka jingshisha, kawei na ki mat kaba ha khmat eh, ha ba wanrah ia kitei ki cement company baheh shapoh ka ri ka muluk jong ngi, ka long, na ka bynta ka ioh kam ioh jam (Direct bad indirect employment) jong ngi ki trai ri trai muluk, hynrei kane kam shym la long kumta, namar kiba bun hi ki kam ki jam hapoh jong kitei ki company ki ioh ei kiba nabar.
“Kumta, halor kitei ki mat jingdawa, lada jia ba kitei ki cement company kim patiaw ei ei ruh em, ka JAC kan sa nang pynjur shuh shuh ia ka jingiakhih jong ka nangne sha khmat bad lada jia ei ei kaba sngewsih, kitei ki company kin hap ban shim ia ka jingbahkhlieh.” la ban biang ka JAC.
“Kane ka jingiakhih, ka dei ka kam iap kam im jong ngi kum ki trai ri trai muluk. Kumta, ngi kyrpad ia baroh ki dkhot jong ka JAC ba kin sngewbha ban ieng skhlem halor kane ka nongrim bad ruh, ban ia shim khia bha ha kane ka jingiakhih. Ka JAC, ka kyrpad ruh ia kiwei pat ki kynhun seng bhalang, khamtam kito, kiba treikam hapoh u pud u sam ka Ri Lum Jaiñtia ba kin sngewbha ban ai ia ka jingkyrshan lem halor kane ka jingiakhih, khnang ba ma ngi kum ki trai ri trai muluk ngin jop na bynta la ka hok, bad ba, ngin ym shah ibeiñ bad thombeiñ ha kiba kum kine ki cement company” la pynkut u kyrwoh na ka JAC.