Ki ar ngut ki Symbud Myntri Rangbah ka sorkar jylla ba kynthup ïa u bah Prestone Tynsong bad u ma Sniawbhalang Dhar mynta sngi saitjaiñ 9 tarik u Jymmang, 2026 kila plie mawnongrim ïa ki saw tylli ki project shna surok kiba la kot sha ka 24 klur tam haka jingïalang bala pynlong ha shnong Barato ha ka jingplie ïa ka ‘Barato Police Outpost’.
Kine ki project kiba dei lyngba ka tnad Public Works (R&B) Department kiba kynthup ïaka jingshna ïa ka surok Intermediate lane with BM&SDBC na Nartiang-Ionglwit-Barato haka jingjrong kaba 14.00-21.0 KM ha ka jingmang pisa kaba 16,93,40,000.00. Ka jingsiang rong ïa ka surok Shilliang Myntang (Internal Village Road) ha ka jingjngai kaba 1.650 km ha ka jingmang pisa kaba 3,07,19,800.00. Kumjuh ka jingsiang rong ïa ka surok shnong ka Maitdieng ha ka jingjrong kaba 3.00 km hapoh ka RIDF-XXX haka jingmang pisa kaba 3,00,00,000.00 bad ka jingshna ïa ka surok na 13th NJB sha Thadbamon ha ka jingjrong kaba 3.017 KM ha ka jingmang pisa kaba 1,78,67,000.00.
U bah Prestone Tynsong ula ong ïa kine ki projek yn sdang ban pyntrei noh ha kine ki taïew ban wan, kumta ula kyntu ïa ki bor shnong khamtam eh ïa ki nongïalam shnong ban long kiba ïatreilang ban pynlong ïa kitei ki project kiba ïaid beit kumba la mang.
Ula ong dang ha kine ki kyndiat sngi kala don ka jingïalang hapdeng ka Synjuk ki Rangbah Shnong kiba la kloi ban ïatreilang bad kino kino ki project jong ka sorkar jylla kiba don ha kylleng ki jaka.
Da kaba u ong ka jingpyrshah ïa ki kam pynroi ka long ka jingduhnoh kaba khraw ïa ka jylla, kumta ka donkam bha ïa ka Synjuk ki Rangbah Shnong ban long kiba ïatreilang bad ka sorkar.
Ha kaba ïadei bad kine ki project surok kiba la plie mynta ka sngi, ula ong kin sa long ka jingmyntoi kaba khraw eh ïa ki paidbah nongshong shnong jong kane ka thaiñ, ‘lada don kino kino ki jingwit jingthut haka rukom trei ïa ka surok, dei ban wan shakhmat ban pynbeit mardor ïa ki jingdonkam.
Katba ïa kiwei de ki jingdonkam jong ka shnong Barato kiba la pynsngew sha u Symbud Myntri Rangbah, ula kular ban pynïoh katba lah khamtam ïa ka umbam umdih ban pynpoi sha ka shnong.