Ka Hynniewtrep National Youth Movement (HNYM), Jaintia Region hynnin ka sngi (8/5/2026) ka la leit buh jingthoh sha ka ophis treikam jong ka Meghalaya State Pollution Control Board (MSPCB) ban pyrshah jur halor ka jingthmu jong ka company Shree Cement Limited ban buh ia ka Factory Cement jong ka ha Lum Syrman.
Ka Seng ka pynpaw ba lada kane ka Company ka ioh ban seng ia ka karkhana hapoh ka Elaka Nongkhlieh, East Jaintia Hills District kan wan rah shibun ki jingma ba khraw ia ki nongshong kumjuh ia ki shnong ba marjan, kum ka jingroi jong ka jingpang jingshitom ba bun jait bad ka jingktah ia ki khlaw ki btap.
Na kata ka daw ka HNYM ka pynpaw ia ka jingpyrshah kaba bur ia kane ka jingthmu jong katei ka company, kane ka long katkum ka khubor ba la pyllait da u President ka seng u Bartis Pajuh bad u Secretary u Mechan Dkhar.