Hadien ba ka jingpynbha ia ka jingkieng Umiam Bypass ka la dep mynta kumta yn plie paidbah ia ka lashai ka sngi 13/05/2026, hadien kata yn shah biang ia baroh ki jait kali kamai kynthup ia ki Bus Night super ban iaid lyngba ia kane ka jingkieng ban poi sha nongbah Shillong ha ka sngi ba bud kata ha ka 14/05/2026.
La katta ruh ka dang katto katne ka jingpyrkhing, ha kaba la shah ia ki kali heh ban iaid tang hapdeng ka por 9:00 mynmiet haduh ka por 7:00 mynstep manla ka sngi. Yn ym pat shah ia ki kali kiba jrong ban iaid lyngba kane ka jingkieng bad tang ia ki kali kiba kit jingkit haduh 28.5 ton yn shah iaid.
Baroh ki bus Night Super ki dei ban pynieng noh ha Inter State Bus Terminal kaba don ha Mawiong. Yn ym shah shuh ia ki ban pynieng ha SRGT, Polo, Shillong Municipal Board Parking Lot kaba don ha Dhankheti, lane ha shilynter ka Itshyrwat-New Shillong Road, Shillong-Jowai Road lane hangno hangno ruh ha ki bynta jong ka nongbah Shillong, lait noh tang hapoh ISBT Mawiong hi.