Ka Dorbar Shnong Hingaria ka pynpaw ka jingsngewnguh kaba khraw bad ka jingsngewburom ia u Myntri ka tnat ka Koit ka Khiah jong ka Sorkar Meghalaya, u Wailadmiki Shylla namar ka jingpynbeit bad ka jingkyrshan halor ki jingeh jong ki paidbah ka shnong Hingaria ha kaba iadei bad ka Sub-Health Centre.
Lah ban kdew ba ka Sub-Health Centre ka shnong Hingaria ka la dep ban ioh jingmynjur na ka bynta ban tei ha u snem mang tyngka 2023–2024 hapoh ka skhim PM-ABHIM (Pradhan Mantri Ayushman Bharat Health Infrastructure Mission) – 2nd Phase, na ka bynta ka jingmyntoi jong ki paidbah jong ka shnong Hingaria kaba don ha ka thaiñ khappud border bad ka Bangladesh jong ka East Jaintia Hills District. Hynrei wat la, la dep ban ai jingmynjur, ym shym la sdang satia ka jingtei haduh katto katne por, kaba la pynmih jingartatien bad jingsngewkhia kaba jur hapdeng ki nongshong shnong.
Hadien kata, lyngba ka jubab RTI na ka ophis jong u District Medical & Health Officer (DM&HO) ba la ioh da u Andrias Talang ba dei u nongiasait aiñ, ki paidbah ka shnong Hingaria ki la tip ba la don ka jingthmu ban pynkynriah ïa ka Sub-Centre na ka shnong Hingaria, kaba la dep ban ai jingmynjur ha u snem mang tyngka 2023–2024 hapoh ka PM-ABHIM – 2nd Phase. Kane ka jingthmu jong ka sorkar lyngba ka office DMHO ka la pynsngew diaw bad pynkyndit ïa ki paidbah nongshong shnong, namar ki nongshong shnong jong ka Shnong Hingaria ki lah khmih lynti la slem bha ban ioh ïa ki jingshakri ha koit ka khiah kaba biang na ka tei ka sub centre ba la dep mang ban tei.
Hadien kane ka jingjia, ki nongialam na ka shnong Hingaria ryngkat bad ki nongialam ka KSU South West Border Circle ki la leit ban iakynduh ïa u ma Wailadmiki Shylla, u Myntri ka tnat ka Koit ka Khiah jong ka Sorkar Meghalaya, bad aiti ïa ka jingthoh (petition) kaba kdew ïa ki jingeh bad ki jingdawa ba don nongrim jong ki paidbah ka shnong Hingaria. Ha katei ka jingïakynduh, u Myntri u la sngap bha ïa ki jingkyrpad bad u la pdiang ruh ïa ka petition, bad khlem da pynslem u la kular ba un peit bniah bad un leh ïa kaba bha tam na ka bynta ka jingmyntoi jong ki paidbah ka shnong Hingaria.
Kumba u kular mynta, ki nongshong shnong bad ka Dorbar Shnong Hingaria ki dap da ka jingsngewkmen bad jingsngewnguh namar ka jingkular jong u Myntri ka la urlong, bad la pynskhem biang ïa ka Sub-Centre na ka bynta ka shnong Hingaria. Kane ka rai ka la wanrah ka jingkmen, jingkyrmen bad ka jinghun kaba khraw hapdeng ki paidbah ka thaiñ khappud. Ka Dorbar Shnong Hingaria ka ngeit skhem ba kane ka jingpynskhem biang kam dei tang ka rai pynïaid kam, hynrei ka dei ruh ka jingithuh ïa ki hok bad ki jingdonkam jong ki paidbah kiba sah ha katei ka shnong khappud. Ka jingtei ïa ka Sub-Centre ha Hingaria kan wanrah jingmyntoi kaba khraw ha ka liang ka koit ka khiah, ka jingïarap ha ki jingpang kyrkieh, ka jingsumar ïa ki longkmie bad ki khunlung, bad kiwei ki jingshakri ba kongsan.
Ka Dorbar Shnong Hingaria ka ai ruh ka jingsngewnguh kaba kyrpang sha ka MLA jong ka thaiñ, i kong Santa Mary Shylla, na ka bynta ka jingkyrshan bad ka jingbuddien kaba radbah na ka bynta kane ka kam jong ki paidbah ka shnong Hingaria. Ngi pynpaw ka jingsngewnguh ruh ïa ka Sorkar bad ki bor kiba dei peit kiba la sngap bad sngewthuh ïa ki jingeh jong ki paidbah ka shnong Hingaria. Kane ka pynskhem ïa ka jingshaniah jong ki paidbah ba ka sur jong ki shnong khappud ka long kaba la iohsngew.
Ka Dorbar Shnong Hingaria khlem da klet ka pynpaw ruh ka jingsngewnguh khamtam ia ka KSU South West Border Circle, ia u Andrias Talang, Nongiasait Aiñ, Hamewanpynhun Ryngkhlem, Nongialam KSU East Jaintia Hills District Unit, Reachingson Siangshai, RTI Activist bad ki wei ki wei de ki ba la don syndah bad ka Dorbar Shnong. Ngi ai ruh ki jingduwai bad ki jingkitbok kitrwiang ia u Myntri ka Koit ka Khiah u Wailadmiki Shylla bad ka MLA ka Santa Mary Shylla bad baroh kito ki ba lah noh synniang ban poi sha kane ka jingjop ba kin nang iai shakri ïa ki paidbah da ka jingkitkhlieh bad ka jingaiti lut.
“Ngi kyrmen ba ka Sorkar Meghalaya lyngba ka health department ba kin pynstet kham kloi ban pyntrei ia katei ka Health Sub-centre khnang ba yn lah ban pyndep ha ka por ba biang bad ngi kyrmen skhem ruh kumjuh ba ka sorkar kan dang pynleit jingmut shuh shuh ha ka roi ka par jong ki shnong khappud da kaba pynkhlain ïa ka koit ka khiah, ki surok, ka pule puthi, Electric Connection, Network Connection bad kiwei ki jingdonkam ba kongsan.
Kane ka long katkum ka kyrwoh na u ma Ting Khonglah, Waheh Shnong Hingaria bad Hamilton Pohtam, Secretary Shnong Hingaria.
