U Myntri Rangbah ka Jylla u Conrad K Sangma ha ryngkat bad u Symbud Myntri Rangbah u Ma Sniawbhalang Dhar ha ka 29 tarik Jymmang 2026 ki la leit ban iakynduh ia u Myntri Rangbah ka Assam u Himanta Biswa Sarma ha Guwahati haba iadei bad ka Lapangap kaba dei kawei na ka jaka khappud hapdeng ka Assam bad Meghalaya.
Na ka liang u Myntri Rangbah ka jylla u Conrad K Sangma u la pyntip ka jingiakynduh bad u Myntri Rangbah ka Assam ka long kaba seisoh ha jingiadon ryngkat lang ki ophisar ka sorkar jylla bad sorkar Assam bad kumjuh na ki district jong ka Meghalaya bad Assam.
Nalor kata u Myntri Rangbah u la pyntip ba ki ophisar na baroh 2 tylli ki jylla hapdeng ka Assam bad Meghalaya kin sa shim ia ki sienjam kumno ban pynbeit ia ki jingeh haba iadei bad ka Lapangap.
U Myntri Rangbah ka jylla u Conrad K Sangma u la kyntu ruh ia ki paidbah nongshong bad kumjuh ia ki ophisar hapdeng ka Assam bad Meghalaya ban iatreilang ban pynbeit ia ki jingeh ha ka lynti ba dei na ka bynta ka shongsuk shongsain jong ki paidbah nongshong shnong ka Lapangap.
Khatduh u la bynrap hadien ba la dep thaw kynhun Myntri ka Assam bad ynda lah dep bam smai ki kynhun Myntri ha Assam ,u Myntri Rangbah ka jylla u Conrad K Sangma u la pyntip ba ka jylla kan sa shong jingialang biang bad ka Assam na ka bynta ka Lapangap bad kumjuh haba iadei bad u pud u sam hapdeng kine ki 2 tylli ki jylla ka Assam bad Meghalaya.
