Ka Jaintia Coal Miners Owner & Supplier Association ha ka 30 tarik Jymmang 2026 ka la phah da ka jingthoh sha u Myntri Rangbah ka jylla u Conrad K Sangma bad kumjuh sha u CEM ka JHADC u Ma Thombor Shiwat, bad kumjuh sha ka Ministry of Coal haba iadei bad ka jingtih dewïong ha ka jylla.
Haba kren sha ki lad pathai khubor na ka liang u President ka Jaintia Coal Miner Owner Supplier Association u bah Marshall B Biam u la ong ka kynhun ka la phah jingthoh sha u Myntri Rangbah ka jylla, sha ka Ministry of Coal ka Sorkar India bad kumjuh sha u CEM ka JHADC na ka bynta ban pynsngew sha ka Sorkar ba kan phai khmat lem haba iadei bad ka jingtih dewïong ha ka jylla.
Nalor kata u la pynpaw naduh ba khang ia u dewïong ha ka jylla ki paidbah nongshong shnong kiba im ja na u dewïong ki lah mad ia ka jingjynjar ha kaba tang ban phah skul ia ki khun ruh kim ioh lad shuh bad wat tang ban bam ruh kim ioh namar ka jingkhang tih dewïong bad ka kynhun ka kyntu ia ka Sorkar ba kan leh ei ei halor kane ka bynta kaba ki paidbah nongshong ki mad ia ki jingjynjar naduh ba khang ia u dewïong ha ka jylla.
Khatduh na ka Liang u President u la kyntu ia ki paidbah ba kin ia snoh kti lang ha kaba kane ka kynhun kan pynlong da ka jingiakhih kaba khlem sangeh bad ka jingleit tur sha ophis jong u Deputy Commissioner ha ka 1 tarik Jylliew na ka bynta ban dawa na ka Sorkar haba iadei bad ka jingkynduh jingeh ki paidbah nongshong shnong kiba im ja na u dewïong.
U la bynrap bad kyntu ia ka Sorkar ba kan shna noh da ka SOP kaba thymmai haba iadei bad ka jingtih dewïong ha ka jaka kaba 100 hectare ka Sorkar ka dei ban ailad noh da kumno kumno 4 hectare kaba long ka jingmyntoi ia ki trai kiba don ia ki par dewïong ha ka jylla ban tih dewïong ha ka jylla.