Ki kynhun Sengbhalang na Mawsynram C&RD Block ba kynthup ia ka FKJGP, HNYF bad ka HYC ha ka 30 tarik Jymmang 2026 ki pynpaw ia ka jingsngew diaw bad dawa ba dei ban weng noh ia ka Sai Computer Ltd ka Company sam bording ha Mawsynram hadien ba ki lai Seng ki lah lap ia ka jingtrei torti bad leh donbor kane ka Company bad kumjuh halor ka jingkynduh jingeh ki paidbah nongshong shnong ka thaiñ haba iadei bad ka bording.
Haba kren sha ki lad pathai khubor na ka liang u Chairman jong ki lai Seng na Mawsynram u bah Tyngshaiñ Rongsang u la ong ki lai Seng ki lah dep ban pynsngew sha u Myntri ba khmih ia ka bording u bah Metbah Lyngdoh ban dawa weng noh ia ka Agreement pynbiang bording bad ka Sai Computer Ltd bad ban shim hi noh da ka sorkar haba iadei bad ka jingsam bording ha ka thaiñ Mawsynram.
U Chairman u la pynpaw ka jingdon ka Sai Computer Ltd ha Mawsynram ka la ktah shibun eh ia ki paidbah nongshong shnong ka Mawsynram ha kaba ka bai bording ka poi da ki hajar bad ka long ka bym iahap shuh.
Kumta ka Seng ka kyrpad ia ka sorkar khamtam sha u Myntri ba khmih ia ka tnad bording ba ka dei ban weng noh ia kane ka jingteh agreement bad ka Sai Computer Ltd haba iadei bad ka jingsam bording ha Mawsynram bad kyntu ruh ia ka Sorkar ba ka dei ban leh ei ei noh bad ban weng noh shi syndon ia ka Sai Computer Ltd na Mawsynram.
Na ka liang u Adviser ki lai Seng na Mawsynram u bah Kyllang Thongni u la ong lada ka sorkar ka dang sngap mynthi ym banse ban wan tur noh sha Secretariat ha ryngkat bad ki paidbah nongshong shnong ka Mawsynram ban dawa na ka Sorkar ba ka dei ban weng noh ia ka Sai Computer Ltd ka Company kaba ai bording sha Mawsynram bad ban kyntu ia ka Sorkar lyngba ka tnad bording ba kan pyniaid hi noh ia ka bording ha Mawsynram.