Ka State Disaster Response Force myn hynnin ka sngi ka la lah ban sei ia ka ka met iap jong uwei u rangbah ba 41 snem ka rta na ka par dewiong ba la iehnoh hajan ka ophis barim jong u DC, Khliehriat, East Jaiñtia Hills District hadien ka jingïakhun kaba 6 sngi kynthih.
Ïa ki shipai jong ka 1st SDRF Battalion kaba na Shillong la pyntreikam da ki bor pynïaid District ha ka 27 tarik u Jymmang 2026 hadien ka jingmih khubor ba uwei u rangbah uba 41 snem ka rta u la hap bakla ha ka 26 tarik Jymmang 2026 ha kawei ka krem dewiong kaba jylliew haduh 120 phut kaba la iehnoh sah la slem hajan shnong Khliehriat, East Jaintia Hills District.
Mar ia ioh jingtip halor kane ka jingjia, ki briew na ka 1st Battalion, State Disaster, ki la hiar mar mar sha katei ka jaka ban peit thuh bniah ia ka jinglong jingman bad ban sdang ban hiar shapoh katei ka krem. Hynrei ki shipai ka SDRF kila shem jingeh shibun namar ka jingjylliew jong ka krem bad nalor kata ka long kaba dap um kumba 40 phut ei ei.
Hadien hynriew sngi jong ka jingpyrshang bad da ka jingiatreilang kaba bteng hapdeng ki briew jong ka SDRF, ki bor synshar shnong bad ki nongshong shnong, kata ha ka 1 tarik u Jylliew 2026 la lap bad ioh sei ia ka met jong uta u rangbah.
Hadien kata na ka liang jong ki SDRF kila aiti noh ia katei ka met iap sha ki Pulit ban ioh leh ia kaba donkam katkum ki kyndon aiñ.
Na ka liang ki bor pyniaid jong ka SDRF ki pynpaw ia ka jingsngewlem sha ka iing ka sem kaba la duh noh bad ka ai khublei ia ka jingkyrshan lang jong ki trai shnong kaba la pynlong ia kane ka kam kaba jop.
Kane ka long katkum ka khubor ba la pyllait da u bah P.H. Shylla, Senior Staff Officer & PRO, Directorate of Civil Defence & Home Guards Meghalaya, Shillong.
