U President ka Jaintia Coal Owner Miners Supplier & Workers Association (JCOMSWA) u ma Marshal S.B. Biam uba la sdang ka jingshah thngan ha ka 1 tarik u June 2026 hajan u Motdur u Kiang Nangbah, uba la shah pynkynriah jubor da ki Pulit na Compound DC Office Khliehriat hynnin ka miet ha ka por kumba 6:40 PM ei ei, um shym la kynrandien ban shah thngan ha ryngkat ki nongkyrshan u dang bteng ka jingshah thngan bad mynta ka sngi ka dei ka sngi kaba ar.
Hadien ba la shah pynkynriah na Compound DC ophis Khliehriat, la pynlong pat ia kane ka jingshah thngan ha Madanbol ka Ladrymbai Dongwah bad la ong ba un iai bteng ka jingshah thngan haduh ba ka sorkar kan pynbna ba la weng ia ka jingkhang tih dewiong.
U President ma Marshall S.B. Biam bad ka kynhun jong u katba dang iaid ki sngi ki dang ioh ia ka jingkyrshan jong ki padibah. Hynnen ka sngi 2/6/2026, da ki spah ngut ki briew na kylleng ki shnong jong ka East Jaintia Hills District kynthup ia ki dkhot jong ka Seng Manbei na Moolang, Wapungskur, Wapungshnong, Lumshyrmit, ki dkhot ka Hima Sutnga Youth Federation, ka HNYF, ka EJYM, ka HYDC, JNC, ka Dedicated for Public Transformation Jaintia Hills Sociery (DPT) bad kiwei de ki dkhot jong ki kynhun sengbhalang kiba napoh ka District bad kiba nabar.
Na ka liang jong u ma Hoping Bareh uba dei u Ex-MDC jong ka Sutnga-Narwan ruh u la wan ban ai ka jingkyrshan ia u ma Marshall halor kane ka jingiakhih jong u.
