– Poi ka jingshah thngan sha ka 52 kynta, yn dang iai bteng u bah Marshall –
U President jong (JCOMSWA) ka Jaiñtia Coal Owners, Miners, Suppliers & Workers Association u Bah Marshall S.B Biam u dang bteng ïa ka jingshah thngan kaba khlem buh por ka jong u haduh mynta ka sngi ka 3 tarik u bnai jylliew 2026.U bah Marshall u la shong shah thngan ha Rymbai Road , Ladrymbai Dongwah katta naduh ka 1 tarik mynmiet ha kaba u la hap ban wan shong shah thngan ha kane kawei pat ka jaka na ki daw ba u khlem ïoh ïa ka jingbit ban shah thngan ha phyllaw ka office u Deputy Commisioner ka East Jaiñtia Hills District.
U Bah Biam mynta ka sngi haba u kren sha ki lad pathai khubor u ong ba ka met ka phad ka jong u dang biang haduh mynta bad ka jingshah thngan ka jong u ruh ka la kot sha ka 52 kynta, na ka liang kiba peit ïa ka koit ka khiah ki bor synshar district ruh kim pat wan sha kane ka jaka haduh mynta, ki paidbah ki la wan ban ai mynsiem namar ba bun hi ki kwah ban plie noh ïa u dewïong bad katba ym pat plie ïa u dewïong un shong shah thngan ha kane ka jaka, u bah Biam u la ong ruh ba um pat nud ban kren eiei na ka bynta ka Sorkar halor kane ka kam namar ba kam pat don ka jingïakren.
Ha kawei pat ka liang, na ka liang u General Secretary jong kane ka seng u bah Khrawbor Ryngkhlem u ong ba ki sengbhalang kiba pher kiba pher ruh ki la wan ban ai mynsiem ïa ki kum ka seng, kiba wan kyrshan ki long u President jong ka Hima Sutnga, na ka HNYF , President jong ka seng VPP EJHD bah Damewanhi L Rymbai bad kiwei kiwei de ki sengbhalang bad ki riewshimet.
Ka seng ha kajuh ka por ka la ai khublei kyrpang ruh ïa u Waheh Shnong ka Shnong Ladrymbai Dongwah ba u la kloi ban buh ruh da ki volunteers ban synran ha kane ka jingïakhih.
