Ka khasi Students’ union (KSU), East Jaintia Hills district unit ha ka 2 tarik Jylliew ka la leit ban iakynduh ia u Deputy commissioner ka East Jaintia Hills district bad u EE MePDCL, Moowakhu East Jaintia halor ka jingkiew kynsan kynsan ka bording electric na ka bynta ki paidbah kiba hap hapoh ka BPL lane ka Below poverty line, ha kaba ki paidbah ba bun ki la ud la nam sha ka seng namar ba ka ktah ia ka rukom im man ka sngi khamtam ia ki khynnah skul bad baroh ki jingdonkam ha ïing.
Ka seng la ong ba ka bording elektrik kam dei shuh tang ka jingdonkam ba kyrpang; hynrei ka dei ka jingdonkam kaba kongsan tam ha ka jingim man ka sngi. Ka long kaba donkam na ka bynta ka jingshai ha ïing, ka jingpyndonkam ïa ki fan ha ka por lyiur kaba shit, ka jingpynneh ïa ki jingbam bad ka jingai lad ïa ki khynnah ban pule hadien ba la dum.
Ka seng ka kyntu ia ka ophis jong u DC bad ia u EE ban shim khia mar mar ia kane ka kam bad ka seng ka la ai jingmut ruh ban map noh ia ka shi syndon ia ki bill light kiba dangsah na ka bynta ki BPL.